Read Yupik Psalm 71 Bible Online

Psalm 71 - Yupik bible

Psalm 71

¹ATANEQ, ullagamken uqisviknaluten; cirliqevkaryaqunii!

²Ellualriaruuten ikayurlua aviusnga. Niillua anirturnga!

³Asvaunak uqisviugi, casguliumalua camun pivkarpek'nii; elpet wiinga qimagvikamken, ingluliurutestekamken.

⁴Agayutmaa, aviusnga assiitellrianek yugnek, tegumiaqestemnek aarinateng yurrlugnek.

⁵ATANEQ, neryuniurutkamken; elpet tusngavikamken ayagyuarraanemnek.

⁶Yuurqaanemnek wiinga cacetuqutekurallruamken; elpet-llu tua-i camun pivkaqsaitarpenga. Taumek nanrarrlainarciqamken.

⁷Amlleret murilken͞gamegteggu ayuquciqa cuqeklua yuugut, tua-i-wa elpet pinilriami uqisngavikngamken.

⁸Ernerpak nanralaramken ucurnarqucin-llu qanrutekluku.

⁹Waniwa ak'allaurrnilua qessayagucaqunii; pinialinilua-llu maa-i unicaqunii.

¹⁰Inglukestenka quyurrluteng qalartut; qanellgutkut pillerkiurluteng tuqutnalua,

¹¹qanerluteng, “Agayutem cakaaraa; ullagluku teguyarturnaurput; kitumek anirturtekaituq.”

¹²Yaaqsigyaqunii, Agayun; Agayutmaa, cukamek ikayuryarturnga!

¹³Picetaarutestenka cirlakumaluteng piunriumakilit. Akngirtengnaqestenka-llu caunrilkumaluteng kiaresngiacecimakilit.

¹⁴Wiinga neryuniurutku'rciqamken; nanrarrlainarluten-llu.

¹⁵Qanrutkeciqaqa assilrianek calian; ernerpak qalarutkaqluku anirturilaucin, wiinga tamalkuan taringesciigalengramku.

¹⁶Wiinga ayagciqua piniliumacimtun ATANERMEK Agayutmek; elpet kiivet elluarucin wiinga nanrautekciqaqa.

¹⁷Agayun, ayagyuarraanemnek elitnaurarpenga, maa-i-llu cali taqeksaunii irr'inarqelriit caliaten qanrutkuralaranka.

¹⁸Waniwa ak'allaurrlua qiilingenge'rma, Agayun, cakaaryaqunii! Nayuqia qalarutkurallemni pinin artuqailucin-llu ukegkunun kinguveqellrianun taigarkanun.

¹⁹Elluarucirpet qiliit tekisngai. Angelriaruut caliaqelalten; elpetun ayuqelriartaituq.

²⁰Picurlagavkararpenga nangteqevkaraqlua-llu, tau͡gaam ataam pinirivkarciqerpenga; petmigmi uitayaaqellemnek nugciiqerpenga.

²¹Takarnarqutka ilaciqan; angnirivkarlua-llu ataam.

²²Ilumun nanrarciqamken aturcetaarlua; nanrarciqaqa piciucin, Agayutmaa. Aturcetaarlua qelutelegkun yuarutnek atuuciiqamken, elpet, Tanqilria Agayutiit Israel-aat.

²³Qayagpagalua nunaniryuglua aturcetaaruciiqamken; tamarmirrlua pitacirramtun aturciqua, tua-i-wa elpet anirtullruavnga.

²⁴Qalarutkeciqaqa elluarucin ernerpak, akngirtengnaqestenka cirlakumiita kiaresngiacecimaluteng-llu.