Read Yupik Psalm 73 Bible Online

Psalm 73 - Yupik bible

Psalm 73

¹Ilumun Agayutem elluarrluki pilarai tamarmirrluteng niisngasten̄i, umyuamegteggun-llu menuilnguut.

²Tau͡gaam wiinga nalirrungellruyaaqua; ukveriucarpiallruunga

³ciknalua qutegtellrianek yugnek, tangerrluku yuut assiitellriit piluaqeralallrat.

⁴Engellugturluteng nangteqsuitelartut; temait-llu natlugtevkenateng pinirluteng.

⁵Allatun yugtun nangteqeksaitelartut; arenqiallugutaitaqluteng-llu allat pinerrlugutaitnek.

⁶Taumek ucuryagcaraq uyamikellriatun atulaqiit, aaricaraq-llu aturaqellriatun aturluku.

⁷Umyugait muirumalartut assiitellrianek, umyuangcarluteng assiitellrianek caliarkameggnek.

⁸Temciarautekilartut allanek yugnek assiitellrianek-llu qalarrluteng; ucuryaggluteng picirkiuraqluteng nangcinaluteng allanek.

⁹Caunrilkelluku Agayun qalartelartut ucuryaggluteng-llu alerquagaqluki yuut nunami.

¹⁰Taumek Agayutem-llu yuin niicugniluki maligtaqulaqait cangalliurutkeksaunaki-llu.

¹¹Qanraqluteng, “Ilumun Agayun mat'umek nalluuq; Quyinrulriim nallunrirngaitaa qaillun picirput.”

¹²Tang waniwa yurrluulriit ayuquciat. Camek pinerrlugutaunateng tukuurrngiinaraqluteng-llu.

¹³Wiinga-qaa elliinginaq ircaqumkun menuunii yuugua assiilngiqsauni-llu?

¹⁴Agayun, elpet nangteqevkararpenga unuaquaqan; anucimirqecetaaraqlua unuakut tamalkuita.

¹⁵Qanellrukuma canek nallunritesciigatniluten, yugpetun ayuqlua yuuyanritua.

¹⁶Umyuangcaryaaqellruunga man'a taringyugyaaqluku, tau͡gaam caperrnarqellruuq wangni

¹⁷iterpailegma Agayuvigpagpenun. Nutaan tuani nallunrillruaqa assiitellriit yuut qaillun pimaarkauciat.

¹⁸Qurrayirnarqellriamun elliciqaten iquvkarluki-llu piunrillerkaatnun!

¹⁹Alqunarmek piunriumaciqut, alingnarqellriakun tuquluteng.

²⁰Qavangutun ayuqut tupalriani catairutaqluteng; tuaten-llu, ATANEQ, elpet tupakuvet umyuaqngairuciiqaten.

²¹Umyuaqa assiitellrani yuucimkun-llu akngiringalua,

²²usvitullrunritua, umyugaunii ungungssitun; tuaten-llu ayuqellriatun tungevnun ayuqlua.

²³Tau͡gaam canivni uitauralartua, elpet-llu tass'uquraraqlua.

²⁴Ciuliqagtelararpenga ayuqucirtuutevgun, iquani-llu ciuniurarkaulua ucurnamun.

²⁵Allamek pikaitua qilagmi elpenek tau͡gaam. Allamek-llu nunami piyukek'ngaunii elpenek tau͡gaam.

²⁶Temka umyuaqa-llu piniarutarkauyaaquk, tau͡gaam Agayutem yuuciqa piniliumaa; ellii kiingan pikciqaqa akwarpak.

²⁷Avtellriit elpenek piunrirarkaugut; piunrirciqngavki piciunrilnguut elpenun.

²⁸Tau͡gaam wangni assirtuq uitalleq caniani Agayutem; ATANREM Agayutem camun pivkaqsaitaanga qalarutkesqelluki-llu wangnun elliin caliaqellni.