Read Yupik Psalm 77 Bible Online

Psalm 77 - Yupik bible

Psalm 77

¹Qayagauraqa Agayun qastulua; Qayagauramni qastulua niitaanga.

²Picurliim tut'aqanga ATANERMUN piicalartua; talligka qulmun yagglukek unugpak piicagaqlua, tau͡gaam nataqutesciigat'lartua uitanqegcitmek.

³Agayun umyuaqaqamku iluteq'lartua; umyuangcaraqama-llu ciunerkairutaqlua.

⁴Elpet, Agayun, qavarciigacet'lararpenga; Umyuarniuryaaqem-llu ugaani camek qanerciigataqlua.

⁵Umyuaqelaranka erenret au͡gkut allrakut-llu ak'a pellullret.

⁶Unugpak umyuaqa cakneq calilartuq; umyuangcaraqama-llu wangnek waten aptaqlua:

⁷“Atanrem-qaa cakaarturluta piqatartuq? Ilukegcitkenqiggngairutaakut-qaa?

⁸Kenekmikun-qaa pektayiilngurkun kenkenqiggngairutaakut? Akqutai-llu-qaa piungairutut?

⁹Agayutem-qaa naklekilaucini nalluyagutaa? Takumcukiyarani-qaa eq'urruciyaramek cimiraa?”

¹⁰Tua-llu qanertua, “Arcaqerluku angniilutkaqa Quyinrulriim Agayutem ciunganicetun ikayurinanrillra wangkutnek.”

¹¹Neq'erciqanka caliaqelallri ATANREM; aa-ang, umyuaqeciqanka irr'inarqelriit caliaqelalten ak'a tamaani.

¹²Umyuangcautekciqanka tamalkuita caliaqelalten, pinirpegun-llu irr'inarqelriit taqelten.

¹³Agayun, elpet piciryaran tamarmi tanqilriaruuq. Allamek agayutmek elpetun angtalriamek pitaituq.

¹⁴Elpet-wa, Agayun, calilriaruuten irr'inarqelrianek, artuqailucin-llu nasvallruluku ellam yuinun.

¹⁵Pinin aturluku yut'en anirtullruaten, kinguvekek Jacob-aankuk Joseph-aaq-llu.

¹⁶Yuum tanglauciatun mer'et, Agayun, tangrramegteggen uluryayugtut, imarpiim-llu et'uqri yugtun alingelriatun qiivluteng.

¹⁷Amirlunek ellalluk igtuq; qilak kallirauq, kenerpallaraluni-llu piciatun.

¹⁸Kalluun migpallartaqluni tem'irtuq, kenerpallagalriim-llu ella tanqigiluku; nuna-llu qiivyuarluni pekluni-llu.

¹⁹Piyuallruuten qairteggun; qerallruan et'ulria imarpik, tau͡gken tumten tangerrnarqevkenateng.

²⁰Qusngiliurtetun ayautellruaten yut'en Moses-aankugnek Aaron-aaq-llu ciuliqagcirluki.