Read Yupik Psalm 78 Bible Online

Psalm 78 - Yupik bible

Psalm 78

¹Yumaa, kitaki niicugniciu ayuqucirtuuteka, qanellrenka-llu murilkelluki.

²Qalarciiqua ayuqestassiigutetgun, taringnarcarluki nallunarqellriit ak'allaat qaneryarat,

³imkut niitelalput nalluvkenaki-llu, ciuliamta wangkutnun qanrutkelallrit.

⁴Irniamten̄un aassaqutekngaitaput, tau͡gaam qanrutkeciqaput kingumta yuinun ucurnarqellriit caliari ATANREM, pinia-llu cali-llu irr'inarqellriit taqellri.

⁵Piurcillruuq picirkiuranek Israel-aam yuinun, alerquutnek-llu Jacob-aam kinguvrinun. Alerqurluki-llu ciuliaput picirkiutni elitnaurutkesqelluki irniaritnun,

⁶kinguitgun yuurtellrianun nallunritesqelluki, cali-llu tamakunun irniarit qanrut'laasqelluki.

⁷Waten piluteng ellaita-llu Agayun tusngavikniaraat, nalluyagutevkenaki caliallri, alerquutai-llu maligtaquluki kesianek.

⁸Ciuliamegtun ayuqenritniartut, inglulitaaryulriatun pamaunateng-llu, pektayiinateng-llu tusngavikevkenaku Agayun wall'u ayuqucimegteggun piciuvkenateng Agayutmun.

⁹Ephraim-aarmiut caskungqeng'e'rmeng urluvernek qimallruut anguyallermeggni.

¹⁰Agayutem akqutii cakaallruat; alerquutai maligtaquyuumiinaki.

¹¹Neq'akenriamegteki caliallri, irr'inarqelrialiat-llu nasvallri ellmeggnun.

¹²Agayun irr'inarqelrialilallruuq takuatni ciuliarita Egypt-aami Zoan-ami carr'ilqami.

¹³Imarpik avegluku qerarcetellrukai; meq qacarnertun ayuqliriluku.

¹⁴Erenrani ciuliqagtelarai amirlukun, unugpak-llu tanqiakun ekualriim.

¹⁵Teggalqut yuilqumi qup'lallrui, merr'itaqluki camaken aciqvanek.

¹⁶Teggalqumek meq maqevkallrua, meq qurrlurtelluku kuigtun.

¹⁷Tau͡gaam assiilngillerteng Agayutem tungiinun taqsunritaat, inglulitaartu'rluteng Quyinrulriamun yuilqumi mertailngurmi uitallermeggni.

¹⁸Pitsaqluteng naspaagaat Agayun cikiisqelluteng neqkanek piyullermeggnek.

¹⁹Ingluliraat Agayun qanerluteng, “Agayun-qaa neqkamek yuilqumi paivciyugngauq?

²⁰Ilumun teggalquq kaugtullrua, meq-llu cakneq tuaken maqluni kuiggaaraat uryurtelluki; tuaten-llu-qaa cikiryugngaakut kelipanek wall'u neqkilluta kemegmek?”

²¹ATANREM niilluki eq'uqertellruuq; kenerkun-llu yun'i callugluki, eq'urrngiinarluni tungiitnun,

²²tua-i-wa ukvenrilata ellminun, ukveqevkenaku elliinun anirturyugngacirteng.

²³Tau͡gaam elliin alerquraa qilak amiigi ikirtesqelluki;

²⁴cikirai neqkaatnek qilagmiutarmek, qilagmek igqaqevkarluki kelipayagaat (manna) ellaitnun neqkaqesqelluki.

²⁵Tua-i yuut ner'ut an'gilat neqaitnek, Agayutem-llu cikirai piyugtaciicetun.

²⁶Cali calaramek anuqengevkaraa, pinimikun-llu anuqa taivkarluku ungalamek.

²⁷Kemegturkaitnek yun'i cikirai amlleqapigtellrianek, yaqulegnek imarpiim cen̄iini qau͡gyatun amllertalrianek;

²⁸tamakut-llu mit'elluki uitaviatnun avataitnun-llu cali.

²⁹Ner'ut-llu yuut aqsiluteng; Agayutem cikiateng piyullratnek.

³⁰Tau͡gaam camirpailgata, nernginanratni,

³¹Agayutem eq'uqrutai, tuqulluki-llu pininrit angutet, kemyunarqenrit ayagyualriit Israel-aam yuini.

³²Tau͡gaam catkevkenaku tamana yuut assiilngillerteng taqsunritaat; irr'inarqelrianek calingraan ukvekevkenaku.

³³Taumek Agayutem tuquvkallrukai yuum aneryaaqallratun cukataluki, alqunarmek pinerrlugtelluki tuquvkarluki.

³⁴Ilateng tuqutaqaki, unegtellriit caulartut Agayutmun; umyuarnayaguciluteng cumiggluteng piicagaqluteng.

³⁵Neq'alaraat Agayutmun qaunqellrucirteng, Artuqailngurmun anirtullrucirteng.

³⁶Tau͡gaam iqluquluku qalartelartut; qalartellrat tamarmi piciuvkenani.

³⁷Piciunritellruut elliinun, akquyutseng-llu elliinun aturpek'naku.

³⁸Tau͡gaam Agayun takumcutalriaruuq yum'inun. Au͡g'aritellrui assiilnguitnek piunrirpek'naki-llu. Amllerqunek qenqertellni pellugcet'laraa, eq'uqerteng'e'rmi nuqingaaqluku,

³⁹tua-i-wa neq'akngamiu yuunginauciat, anuqetun ayuqngata ataam uterrngailngurtun.

⁴⁰Amllerqunek atam inglulitaalallrulriit yuilqumi; amllerqunek angniitevkaraqluku!

⁴¹Pinqigtaarluteng naspaallruat Agayun; nanglluku Tanqilria Agayutiit Israel-aam yuin.

⁴²Nalluyagutellruat angelriamek pinilriarucia neq'akevkenaku-llu erneq ellaitnek anirturillra inglukestaitnek,

⁴³irr'inarqelrialiluni angelrianek-llu calillra carr'ilqaini Zoan-am Egypt-aam nuniini.

⁴⁴Kuiget mer'it augurcetellrui Egypt-aarmiut-llu merkaunateng.

⁴⁵Ciivagugaat-llu tuc'etellrui ellaitnun, tamakunun nangtelluki, peleqpelraat-llu cali nuniit assiirulluku.

⁴⁶Petgertayulit-llu cali tekicetai naucetaarit neresqelluki naucetaarviit-llu piunriisqelluki.

⁴⁷Wine-arkat naucetaarit piunrillrui kavtagteggun cali-lu atsangtulit napat qakurnam piunrirluki.

⁴⁸Kavcirtelluku tuqutellrui kuluvautait, katngautait-llu tuquqluki kalluum kenerpallarallrakun.

⁴⁹Nanikuavkallrui cakneq, ellaitnun tuc'elluku qenngutni alingnarqelria-llu eq'uqrutni, tamakut taivkarluki ellaitnun tuqunarqelriaruluki.

⁵⁰Eq'uqertellni nuqingallrunritaa tuqumek-llu anagcetevkenaki, tau͡gaam tuquavkarluki cangerlagkun.

⁵¹Yung'eqarraarutait tan'gaurluut tuqutellrui tamalkuitni ilakuralriit Egypt-aami.

⁵²Nutaan qusngiliurtetun yun'i ayautai, ciuliqaggluki katngagnek ciuliqagcilriatun, yuilqukun.

⁵³Ciuliqagtai aarnailngurkun, ellait-llu alingevkenateng; tau͡gaam inglukestait imarpigmi piunrirtut qecuqilluteng.

⁵⁴Elliin ayautai tanqilriamun nunautminun, ingrinun elliin cirlakiluni tegullerminun.

⁵⁵Tamatum nunam yui antai yum'i ciunratnek; avegluku nuniit ilakellriartainun Israel-aam yuin, enait-llu piksagutelluki yum'inun.

⁵⁶Tau͡gaam ingluliraat Quyinrulria Agayun naspaaluku-llu. Alerquutai atunritait,

⁵⁷tau͡gaam inglulitaarluteng ciuliameng piciunritellracetun ayuqluteng, nalirrugnaqluteng nakrialngurtun pitegcautetun.

⁵⁸Agayun qenercetaat agayuyaramegteggun, eq'urtelluku tuaten agayutngualiamegteggun.

⁵⁹Man'a tangrramiu Agayutem eq'urtuq cakneq, Israel-aam-llu yui cakaaqapiggluki.

⁶⁰Unitaa-llu pelatekani Shiloh-mi,[17] uitavikenrirluku uitavikelallni tuani.

⁶¹Inglukestemten̄un-llu teguvkarluku Akqutem Yaassiiga, tangrrutii pinimi ucurnarqucimi-llu.

⁶²Qenrutellrui elliin nakmiin yun'i tuqurqevkarluki-llu inglukestaitnun.

⁶³Anguyagkun tuqurqumaluteng ayagyuarit, neviarcaraat uikairutelluki.

⁶⁴Agayulirtait anguyagkun tuqurqumallruut, nulirritnun-llu tuquilriit piciryarait aturcetevkenaki.

⁶⁵Tua-llu ATANEQ tupagtuq tuarpiaq qavallerminek; yugtun pinilriatun ayuqluni wine-am segg'arceskiitun.

⁶⁶Kingupiartai inglukesten̄i, kiaresngiatelluki iquilngurmek.

⁶⁷Tau͡gaam elliin cakaarai Joseph-aam kinguvri; cucukevkenaki Ephraim-aam ilakellriartai.

⁶⁸Tau͡gaam cucukluki Judah-m ilakellriartai Ingriq-llu Zion-aaq elliin cakneq kenkek'ngani.

⁶⁹Tuavet napartaa Agayuvigpani enemitun pakmani qilagmi; piliaqaa pektayiirulluku nunatun, asvaitarkaurtelluku akwarpak.

⁷⁰Cucukluku-llu David-aaq pisten̄i; tegullrua maranek,

⁷¹tamaaken katngagnek qaunqillranek, atanrurcetaa-llu Israel-aanun, qusngiliurten͞gurrluku Agayutem yuinun.

⁷²David-aam-llu aulukai elluarucimikun piugteqluni, kemyunarqellni aturluku ciuliqaggluki.