Read Yupik Psalm 83 Bible Online

Psalm 83 - Yupik bible

Psalm 83

¹Agayun, nepaitenrilu; uitauranrilu wall'u niitnaunak uitaluten!

²Atam inglukesteten nep'ngelriit uitanrirluteng, tamatum-llu arcaqanranek eq'ukestevvet inglulirluten.

³Aassaqluteng picirkiurtut inglulirluki yut'en; quyurrluteng picirkiurtut inglukluki qunukek'ngaten.

⁴Qanerluteng, “Tailuci piunrirnauput atanruviunrirtelluki, umyuaqumanqigtenritniartut Israel-aam yui mat'um kinguani.”

⁵Umyuallgutekliutut picirkiurameggnun, iliksagulluteng inglulirnaluten,

⁶ukuuluteng Edom-aam yui Ishmaelite-at-llu; Moab-am yui Hagrite-at-llu;

⁷ukut-llu cali yuit: Gebal-aam, Ammon-aam, Amalek-aam-llu, cali-wa yuk'ek Philistia-m Tyre-am-llu.

⁸Assyria-rmiut-llu cali ilaulluteng, pinilirluki Lot-aam kinguvri Ammonite-at Moabite-at-llu.

⁹Ukut pikiki Midianite-at pillerpetun, Sisera-nkuk-llu Jabin-aaq-llu pillerpetun Kishon-aam Kuigani.

¹⁰Taukut cirlakellrukten Endor-ami, temait-llu aruluteng nunam qaingani.

¹¹Ciuliqagtait pikiki pillerpetun Oreb-aankuk Zeeb-aq-llu; cirlakekiki atanerruarit pillerpetun Zebah Zalmunna-llu,

¹²waten qanellrek, “Wangkuk teguluku piksaguciiqerpuk nuna Agayutem pia.”

¹³ATANEQ, ull'uyam ayagaskiitun urr'artun ayuqlirivkarki, carangllugtun-llu anuqem tengeskiitun.

¹⁴Kenrem ekualauciatun napat, kenrem-llu ingrit ekevkarluki,

¹⁵tuaten-llu elpet malirqerluki qimagteski ellarayagpegun nanikuavkarluki anuqerpagpeggun.

¹⁶ATANEQ, kiaresngiatevkarki, pinilriarucirpet piciucia ukveqniaraat.

¹⁷Ataki nanikuakilit cirliqluteng-llu akwarpak; watqapik pikegtakumavkenateng yuunriqilit.

¹⁸Kiivet atanrucin nallunrirtessgu ellaitnun, Quyinrulriaruluten Atanruluten, ataniumaluku nuna tamalkuan.