Read Yupik Psalm 86 Bible Online

Psalm 86 - Yupik bible

Psalm 86

¹Niicugninga, ATANEQ, ikayurlua-llu, casciigalnguungama pinianii-llu.

²Tuquvkaryaqunii pisqellren tamalkuan atungnaquralaamku; anirturnga, tua-i-wa wiinga pistekngavnga, cacetuqutekngamken-llu wiinga.

³Piicagvik'laramken kesianek, taumek takumcukia, wiinga Agayutekngamken.

⁴ATANEQ, wiinga pistevni yuuciqa angnirivkarru, elpenun piicagturalaama.

⁵ATANEQ, assirluta piuralararpekut, au͡g'aritaqluta, kenkutengqerravet cakaniyuilngurmek elpenun piicalrianun.

⁶Niicugninga, ATANEQ, piicallemni; niisgu qayagalqa ikayuusqellua.

⁷Picurlagaqama piicagvik'laramken, piicautenka piciurtelaavki.

⁸ATANEQ, agayucetaituq elpetun ayuqellriamek, calilriartangqeqsaunani-llu elpet caliarpet ayuqaitnek.

⁹Piliaqellerpet atanruviit yuita tailuteng ciuqerpenun ciktaarvikciqaatgen; nanrarciqaatgen angtatailavet.

¹⁰Artuqaituten elpet caliaten-llu irr'inaqluteng; elpet kiivet Agayutnguuten.

¹¹ATANEQ, piciryaran aturluku pillerkamnek elitnauqia, niisnganiamken piciulua; ayuqucirturnga kevgiullerkamnek elpenun yuucimkun tamarmirrlua.

¹²ATANEQ, Agayutmaa, umyuaqa tamalkirrluku nanrarciqamken; qalarutkelarciqaqa angtatailucin taqsuunii.

¹³Ilumun angtataituq kenken cakaniyuilnguq wangnun! Anirtullruarpenga tuquarkauyaaqellemnek.

¹⁴Agayun, ucuryaggluteng yuulriit ingluliraatnga; aarilnguut quyurmeng tuqutengnaqaatnga, imkut yuut caukinrilnguut elpenek.

¹⁵ATANEQ, elpet tau͡gaam naklegtarluten kenkitarluten-llu Agayutnguuten, qenqerrngianak, takumcutarluten, qacuiyuunak-llu.

¹⁶Tuiggviklua naklekia; pistevni wiinga piniringa anirturlua-llu, pistevvet arnam qetunraqnganga.

¹⁷ATANEQ, assilriarucin nasvaggu wangnun caliarpegun; eq'ukestenka kiaresngiatniartut tangerrluku elpenun caceturivkauciqa ikayuumaciqa-llu.