Read Yupik Psalm 89 Bible Online

Psalm 89 - Yupik bible

Psalm 89

¹ATANEQ, aturciqua kesianek yuarutekluku nangyuilnguq kenken; qanrutkarkaugaqa wangkutnun piciucin taqsuunii.

²Elpet kenken piugarkaungan iquklicuunani, piciucin-llu piugurararkaungan qilagtun.

³Elpet qanellruuten, “Akqutmek taqutellruunga cucukek'ngamnun; akqellruaqa pisteka David-aaq,

⁴‘Elpet kinguverpenek Israel-aaq atanengqerrlainarciquq; atanruyaraq kinguvarceciiqaqa kinguverpenun akwarpak.’”

⁵Qilagmelnguut aturtut yuarutekluki assiqapigtellriit caliaten; ATANEQ, qilagmiut aturpagtut piciucin yuarutekluku.

⁶ATANEQ, qilagmi pakmani elpetun ayuqellriartaituq; avaqlirpet qilagmiut pitacirciigataatgen.

⁷Arenqiirturtet pakmani uluryayulartut elpenek; tamarmeng qigcik'laraatgen.

⁸ATANEQ Agayun Artuqailnguq, elpetun artuqailngurmek pitaituq; callerpegun tamaitgun piciurrlainartuten.

⁹Imarpik piyunailengraan ataniumaan; qairvangraan quunengevkaraqluku.

¹⁰Rahab-aq[19] navgullruan tuqulluku; inglukesteten cirlakellruaten artuqailngurkun pinirpegun.

¹¹Qilak nuna-llu pikagken; piliaqellruavkek tamaanelnguut-llu tamalkuita.

¹²Piliaqellruagken negeqvaq ungala-llu; Ingrim Tabor-aam, Ingrim-llu Hermon-aam atuutaagten nunaniryuglutek.

¹³Anglilli elpeni pinirpaa! Pinin angtataituq!

¹⁴Elluaruciq pitalqeggsaraq-llu angayuqauvigpet tusngavikak; kenka piciuneq-llu nasvaumauk cani tamalkuitni pillerpeni.

¹⁵Atawaqertut yuut nanrarilriit elpenek yuarutetgun, uitauralriit ciuqerpet tanqiani.

¹⁶Nunaniryuutek'laraatgen kesianek, nanrarluten-llu assiucin pitekluku.

¹⁷Elpet angelriakun pinirpegun cirlakilriaruvkalararpekut; kenekngavkut anagcetaqluta.

¹⁸Elpet, ATANEQ, cucukellruan ingluliurutestekarput; elpet Tanqilria Agayutiin Israel-aam, cikillruarpekut atanerkamten̄ek.

¹⁹Ak'a tamaani tangercelluten qanrutellruan pisten prophet-aaq, “Wiinga pinilillruaqa anguyagten̄i piuranrulria; cikiutekellruaqa atanruvik aqumlleq wiinga cucukellemnun.

²⁰Pisteka David-aaq atanrurcetellruaqa, kuvluku tanqilriamek uqumek qamiqurrakun.

²¹Wiinga piniliumarrlainarciqaqa, pinima pinirivkararkauluku.

²²Inglukestain anguyakunegteggu elluatuqngaitut; assiitellriit-llu yuut cirlakngaunaku.

²³Tangvagtelluku inglukestai piunrirciqanka, tuqulluki tamalkuita eq'ukestai.

²⁴Kenkeciqaqa piciulua-llu tungiinun; ikayurrlainararkaugaqa cirlakevkaraqluki inglukestai.

²⁵Angayuqauvia sagceciiqaqa imarpigmek Mediterranean-aamek Kuik Euphrates-aaq tekilluku.

²⁶David-aam waten qanruciiqaanga, ‘Elpet wiinga atakamken Agayutekluten-llu; cayailkutkamken anirturtekluten-llu.’

²⁷Yung'eqarraarutem angutem piktukainek cikirciqaqa, quyinruvkarluku atanerni tamalkuitni.

²⁸Kenkerrlainarciqaqa nangyuilngurmek, akquyuteka-llu elliinun piugarkauluni akwarpak.

²⁹Atanruvia piurrlainarciquq qiliim piullran taktaciatun; kinguvranek atanertangqerturalarciquq.

³⁰“Tau͡gaam kinguvrin alerquutenka narureskatki, yuuluteng picirkiutenka maligtaquvkenaki,

³¹ayuqucirtuutekellrenka cakaarluki alerquutenka-llu aturpek'naki,

³²wiinga assiilngiata anucimirqecetaarciqanka; nangtequtekevkarluki alarqaqellrit.

³³Tau͡gaam wiinga kenkenrirngaitaqa, akqutkellrenka-llu elliinun pinricen̄arngaunaki.

³⁴Akquyuteka elliinun navegngaitaqa cimirarkauvkenaku-llu atauciungraan akqilua qanelqa elliinun.

³⁵“Akwarpak piugarkamek akqillruunga tanqilria atqa aturluku: Iqlungaunaku David-aaq.

³⁶Kinguvengqerrarkauguq akwarpak, atanrulararkauluteng akertem piullran taktaciatun.

³⁷David-aam angayuqauvia iralutun piuciquq nangyuunani, pektayiiciiqluni qiliim piullran taktaciatun.”

³⁸Tau͡gaam elpet, ATANEQ, qenrutan cucukek'ngan ataneq; cakaaran unilluku-llu.

³⁹Akqutkellren pistevnun navgan atanruluni nasqurrutii cailkamun eggluku.

⁴⁰Nunarpiin casgui navguraten asvairqumalriit-llu qimagvii imerqelluki.

⁴¹Tamaaggun-llu kitulriit akluinek tegurqelartut; avaqliin-llu atanruviit yuita ciritekaqluku.

⁴²Inglukestai cirlakivkaraten; tamalkuita-llu nunaniryugcetaten.

⁴³Caskui catngunrircetaten, cirliqevkarluku anguyallrani.

⁴⁴Tegullruan takarnarqutii scepter-aara, atanrullranek-llu au͡g'arluku.

⁴⁵Pinarivailgan angulluarcetellruan angelriamek kasnguyugtelluku.

⁴⁶ATANEQ, iirumaqatartuten-qaa akwarpak? Qaillun-llu pitalriamek qenerteqatarcit?

⁴⁷Neq'akiu yuum ak'anun unguvayuilucia; nauwa piliaqellrukevkut tuquarkauluta!

⁴⁸Yugmek unguvalriartaituq tuqungaunani, yugtaunani-llu ellminek anagyugngalriamek tuqumek.

⁴⁹ATANEQ, nauwa ciuqvani kenkillren wangkutnek? Nauwa-llu akqutkelten David-aamun?

⁵⁰Nalluyagucaqunaku qaillun wiinga pisten͞gulua elpenun caunrilkumalqa, aniqlaamaaqlua-llu yugteggun agayuyuilngurteggun elpenun.

⁵¹ATANEQ, inglukestevvet caunrilkuuraat cucukellren ataneq! Nantellrani tamiini caunrilkuularaat.

⁵²Nanrarciu ATANEQ akwarpak! Amen! Amen!