Read Yupik Psalm 9 Bible Online

Psalm 9 - Yupik bible

Psalm 9

¹Wiinga nanrarciqamken, ATANEQ, ircaqumkun tamalkirrlua; qanrutkeciqanka-llu irr'inarqellriit caliaten tamalkuita.

²Angnirciqua nunaniryuglua elpet pitekluten; Aturciqua nanrarluku atren, quyinrulriaruavet.

³Inglukestenka qimalartut alairaqavet; paallagaluteng tuquagaqluteng.

⁴Cuqcillren pitalqegtuq piciuluni-llu, cuqcillerpeni-llu wiinga takumcukellruarpenga.

⁵Angayuqauviit yuit pinarqelriarurcetaten, piunrirluki assiitellriit yuut, atrit-llu perrirluki neq'akumangairulluki.

⁶Inglukesteput catairutut tayima; nunarpait-llu elpet piunrirluki yugmun umyuaqenqiggngairutelluki.

⁷Tau͡gaam ATANEQ atanruarkauguq iquilngurmek, atanruvini-llu uptellrua cuqcivigkaurrluku.

⁸Atanirturciqai nunam yui ellualriakun, pitalqellriakun-llu yuut cuqtaqluki.

⁹ATANEQ uqisvikaat nangcimalriit, qimaumavikluku picurlaumalriit.

¹⁰Aterpet nallunritestain cacetuqutekciqaatgen, tua-i-wa, ATANEQ, elpet cakaayuilavki elpenun tailriit.

¹¹Aturci nanrautnek ATANERMUN Zion-aami atanirturilriamun! Qanrutekluki yugnun tamalkuitnun caliari.

¹²Agayutem cakaarngaitai nangteqellriit; nalluyagusngaitaa-llu iluteqellrat, akinaurut'laamiki tuqutaulriit.

¹³Takumcukia wiinga, ATANEQ! Tangerki nangtequtenka inglukestemnek! Aviullua-llu tuqullerkamnek, ATANEQ,

¹⁴Jerusalem-aarmiut ciuqerratni nangerrlua qanruteknaunka caliaten nanrarnarqellriit, angnimek-llu imangqerrniartua anirtuavnga elpet.

¹⁵Angayuqauviit yuit igtut petmignun ellaita elallermeggnun. Ellaita caliameggnun ellmeggnek pitaqut.

¹⁶ATANEQ ellminek nallunairtuq elluarrluni cuqciyaramikun, assiitellriit-llu yuut naptut ellaita caliameggnun.

¹⁷Assiitellriit yuut, cakaarilriit Agayutmek, ciunerkangqertut tuqumek.

¹⁸Tau͡gaam enuqitellriit yuut nalluyagucimangaitut, arrsaulriit-llu neryuniurutengqellriit Agayutmi cakaarumangaunateng.

¹⁹ATANEQ, caunrilkevkanrilu yugnun; atanruviit yuit taivkarluki ciuqerpenun cuqeski pinarqelriarurrluki.

²⁰Alingmek imirki, ATANEQ; tangerrniaraat yuunginaucirteng tuquarkaucirteng-llu.