Read Yupik Psalm 91 Bible Online

Psalm 91 - Yupik bible

Psalm 91

¹Kina imna uitaurquni qimaumavikluku Quyinrulria, cayailkuciumavkarluni Artuqailngurmun,

²waten qaneryugngaciquq ATANERMUN, “Elpet ingluliurutestekamken cayailkutekluten-llu. Agayutkamken, cacetuqutekluten wiinga.”

³Iirumalrianun napcetaanun pivkarngaitaaten, tuqunarqelrianun-llu cangerlagnun pivkarngaunak.

⁴Yaqulgem piyagaminek yaqugmikun uqisngavkarilauciatun, Agayutem aulukciqaaten alingniurcetevkenak; akqutkellni-llu pinricen̄ayuilamiki camun pivkarngaitaaten akiurutarkauluten-llu.

⁵Unugmi alingnarqellriit anernerrluut aliknarqenritaten, wall'u alqunarmek curukalriit erenrani

⁶wall'u cangerliit tut'elalriit tan'germi wall'u assiitellriit tuqucilalriit erenrani.

⁷Yuut tiissitsaat tuquayartut canivni, wall'u qulen tiissitsaat avatevni, tau͡gaam elpet agtuumangaituten.

⁸Kiarrluten tangerciqan qaillun assiitellriit anucimirqecetaarumallrat.

⁹Elpet-wa akiurucecavet ATANERMUN, Quyinrulriamun-llu cayailkuciumavkaavet,

¹⁰pinerrlugutem tusngaitaaten, cangerliim-llu uitaviin mallegngaunaku.

¹¹Agayutem an'gilaminun nayurceciiqaaten, qaunqevkarluten callerpeni tamiini.

¹²Kevgumaciqaatgen tamakut akngirrnayukluki it'gaten teggalqunun.

¹³Tutmarciqaten yugtutulit ciissirpiit-llu, alingnarqellriit yugtutulit tuqunarqelriit-llu ciissirpiit tutmarluki.

¹⁴Agayun qanertuq, “Wiinga anirturciqanka kenkestenka camun-llu pivkarngaunaki nallunritestenka Ataneqlua.

¹⁵Qayagauqatnga niiciiqanka; picurlaumallrata-llu nalliini nayurluki. Wiinga anirturciqanka atawaqertelluki-llu.

¹⁶Nunulirciqanka unguvamavkarluki; anirturluki-llu.”