Read Yupik Psalm 92 Bible Online

Psalm 92 - Yupik bible

Psalm 92

¹ATANEQ, assilriaruuq quyaneq elpenun, atuaneq nanrarluten elpet Quyinrulriami,

²qalarutekluku pektayiilnguq kenken unuakut tamalkuita, atakuaqan-llu wangkutnun piciucin,

³aturcetaat aturluki, ayuqenrilnguut qelutelget aturcetaat.

⁴ATANEQ, ucurnarqelriit caliarpet angnircet'laraatnga; caliaten umyuaqluki angnirlua atualartua.

⁵ATANEQ, ucurnaqvagtat caliaten! Picirkiuraten-llu taringumasciiganateng!

⁶Taringeluaqayuilnguum yuum nallunrirciigataa man'a; usviilnguum taringesciigataa una:

⁷Assiitellriit yuut nauyaaqeciqut canegglugtun, piciunrilngurmek-llu atulriit piluaqeraciqsaaqut; tau͡gaam tamarmirrluteng piunriumaarkaugut,

⁸tua-i-wa elpet, ATANEQ, angtatailavet akwarpak.

⁹Nallunailngurmek inglukesteten piunrirciqut, assiilngurmek-llu calilriit tamarmeng cirliqluteng cekavciiqut.

¹⁰Pinirivkararpenga yuilqurmiutartun kuluvagngalngurtun; angnirivkarlua-llu.

¹¹Tangellruaqa cirlakumallrat inglukestem̄a niitellruluku-llu nanikualuteng eriniallrat assiilnguut callugtem̄a.

¹²Ellualriit ayuqeciqut nauluaqalriatun uksuyuilnguum napaitun; naugarkauluteng cedar-aatun napaitun Lebanon-aam.

¹³Naucetaatun napatun ayuqut ATANREM eniini, nauluaqalriatun Agayuvigpiini Agayutemta,

¹⁴ak'allaurteng'e'rmeng atsanek naugiurluteng, mecurtuluteng nalayuunateng-llu.

¹⁵Mat'um nallunairaa ATANREM ellualriarucia; canganarqutailucia aulukestem̄a.