Read Yupik Proverbs 1 Bible Online

Proverbs 1 - Yupik bible

Proverbs 1

¹Assilriit ayuqucirtuutai Solomon-aam qetunraan David-aam Israel-aat atanrata.

²Waniwa ukut qaneryarat yugnun nallunritesqelluku umyuartuneq ayuqucirtuun-llu cali-llu taringesqelluki qaneryarat elluarrluki.

³Elicungcaumasqelluci umyuartuluni yuullerkamek, piciuyaramek, elluaryaramek, pitalqellerkamek-llu.

⁴Eliteksailnguut umyuartuyaramek elitesqelluki, ayagyuat-llu canek umyuangayurisqelluki.

⁵Cali ukut qaneryarat umyuartulriim nallunrilkengaa ilayugngaat, elitnaurumalrianun-llu ciuliqagutnguluteng.

⁶Taringyaurtesqelluki nallunarqelriit qaneryarat kangiit camek-llu nallunarqelriamek umyuartulria qanqan.

⁷ATANREM qigcikellra ayagniutnguuq elisngamun; tau͡gaam usviilnguut caukenritaat umyuartuneq ayuqucirtuun-llu.

⁸Qetunramaa, niisgu ayuqucirtuutii atavet, cakaarpek'naku-llu alerquatii aanavet.

⁹Tangnircautnguarkaungata qamiqurpenun, uyamiuluteng-llu uyaqurpenun.

¹⁰Qetunramaa, assiilngurtulriit yuut unayaqkatgen maligarucaqunak.

¹¹Waten qanqata, “Maligeskut tuqucinaurtukut nayurluki iirluta cacetaanrilengraata.

¹²Tangerqumceteng unguvaciqsaaqut cavkenateng, tau͡gaam taqkumceteng tuqumaciqut.

¹³Assilrianek akitulrianek tukuutengniartukut, eneput-llu imarturiniartut teglegamten̄ek.

¹⁴Tailuten ilalirkut, avegciqaput tamalkuita teglegaput.”

¹⁵Qetunramaa, maligucaqunak tuaten ayuqellrianun, ilaliqsaunaki-llu.

¹⁶Assiilngurmek aturyukaaralartut tuquciyukaarluteng-llu.

¹⁷Assirngaituq kuvya nengeskuni alailngurmun yaqulgem pissuqengam tangvakiinun.

¹⁸Tuaten ayuqellriit yuut ellmeggnek pissuucilartut, napciiqut tuquluteng-llu ellaita pissuutmeggnun.

¹⁹Teglengalriim unguvani cagmalaraa teglegyullermikun; waten tamarmeng ayuqut mulngakevkenateng yuulriit.

²⁰Umyuartuneq qayagpagauq tumyarani, yuut-llu tuneniarviitni erinani antaa.

²¹Qayagaurtuq nunat iteryaraitni, yuut-llu quyurrviitni:

²²“Usviilngurni yugni! Qangvarpak usviinaci yuuqatarceci? Qangvarpak caunrilkilriit caunrilkiqatartat usviilnguut-llu eq'ukluku elisnga?

²³Niicugnilaa ellangcaraqamken; ayuqucirtuutmek assilriamek cikirnaamken, qaneryaranka-llu elpenun nallunrirtelluki.

²⁴Qayagaularyaaqamken, kelegluten taisqelluten, tau͡gaam niicuumiitaqluten. Ilangciksaunii-llu.

²⁵Niitenrilngualaraten-llu tamalkuita ayuqucirtuutenka ellangcautenka-llu catkevkenaki.

²⁶Taumek wiinga temciarautekciqkemken pillugnam tuskaten. Anglanitekciqamken-llu nanikuakuvet,

²⁷anuqerpagtun nanikuanarqelriim tekiareskaten, picurlagnarqellriim ull'uyatun tekiskaten, nanikualuten-llu ciunerkairulluten.

²⁸Tuani qayagaurciqsaaqerpenga, tau͡gaam wiinga kiungaitua; ilungluten yuange'rpenga nalaqngaitarpenga.

²⁹Tua-i-wa eq'ukellruavgu elisngayaraq cucukevkenaku-llu qigciklerkaa ATANREM,

³⁰ayuqucirtuuteka cakaarluku, caunrillekluku-llu tamalkuan ellangcauteka.

³¹Taumek pikiurarpenek akurturciqelriaten, elpet-llu tuaten pilallerpet naulluuvkarluten.

³²Eliteksailnguut tuqulartut qessakngamegteggu umyuartuneq, usviilnguut-llu yuut piunrilartut ellmeggnek piugtequtailameng.

³³Tau͡gaam kia niisngakunia pengegnaunani uitaciquq; uitanqegciciquq camek assiilngurmek civuurataunani.”