Read Yupik Proverbs 10 Bible Online

Proverbs 10 - Yupik bible

Proverbs 10

¹Solomon-aam ukut qanruyutekai: Umyuartulriim qetunram atani ilukegcivkalaraa; tau͡gken usviilnguum aanani angniicetaqluku.

²Tukuutet assiitellriakun unakumalriit assilriamek iqungqerrngaitut; piciuluten tau͡gaam pillerpet unguvavkarciqaaten.

³ATANREM ellualriit kaigcessngaitai, elluanrilnguut tau͡gken piyullratnek unangevkarngaunaki.

⁴Qessayullerpet arrsaurceciiqaaten, taqaunani tau͡gaam caliuralria tukuurtetuuq.

⁵Ellatulria yuk quyurtelartuq naunrarnek pinariaqata; canganarquq yuk qavaryulria quyurciyaram nalliini.

⁶Assilria yuk atawaqautnek akurtulartuq. Assiitellriim yuum qanllermikun iirumalaraa eq'uqercullni.

⁷Assilriit yuut umyuaqumalarciqut atawaqautetun, tau͡gaam assiitellriit yuut tamaa nalluyagucimalartut.

⁸Ellatulriit yuut ciuniutuat ayuqucirtuun assilria. Yuut picimegcetun qalarculriit caunrirciqut.

⁹Canganarqutailnguq yuk camek umyuarniurutaitelartuq, tau͡gken yuk piciunrilngurkun pilria nallunrilaraat.

¹⁰Piciunrilngurmek nallunairinrilnguq picurlagcecilartuq, tau͡gken ancurturpek'nani kitugcilria uitanqegcivkarilriaruluni.

¹¹Elluarrluni yuulriim qanra ayuquq ulvelriatun unguvanarqelriamek. Tau͡gaam assiitellriim yuum iirumalaraa eq'uqercullni.

¹²Eq'ukiyaraq paivcilartuq picurlagmek, tau͡gaam kenkilriim aug'aritelaraa yuk tamalkuan.

¹³Elisngalriit yuut ellalegtarmek qalartelartut, tau͡gaam usviilnguut yuut anucimirqecetaarnarqut.

¹⁴Umyuartulriit pitacirmegcetun elisngaringnaq'lartut, tau͡gaam usviilnguut yuut qannguamegteggun picurlagmek paivcilartut.

¹⁵Tukuutaita tukuulriit cayailkuciumalarait; arrsiteqsaram yuk yuk'egtaunrilaraa.

¹⁶Akiliutengqertuq ellualria unguvamek, tau͡gaam yuk assiilngiraqami assiilngua allanek ilangelartuq.

¹⁷Yuut ciuniurilriit ayuqucirtuutmeggnek unguvaciqut, yuk tau͡gken nunurtem̄inek cakaarilria iqlutmun ayalartuq.

¹⁸Eq'ukutminek iirilria iqlungalriaruuq. Kina-llu imna qanerrlugnek sagcilria usviituq.

¹⁹Qanerpakarluni yuk aarnarquq assiilngirnayukluni, tau͡gaam kina qanqataitenrilnguq umyuartulriaruuq.

²⁰Assilriim yuum qanellra menuilngurtun akitun qevlerlitun ayuquq; tau͡gaam assiitellriim yuum umyugaa caungailngurnek taqutelartuq.

²¹Qanellri ellualriim ikayuq'ngeciqut amllernek yugnek, tau͡gken usviilnguut tuqulartut ellangqenrilameng.

²²ATANREM atawaqerteskaten tukuutetgun umyuarniurutaiciiquten.

²³Anglaniyarauluku assiilnguq usviilnguum atularaa, usvituyaraq tau͡gaam ilukegcinarqelriaruuq taringumalriamun.

²⁴Assiilnguum yuum aaqekii elliinun tut'arkauguq, ellualriit-llu piyullerteng unakarkauluku.

²⁵Ellarayiim assiitellriit tengulluki catairutevkalarai, tau͡gaam ellualriit uqisngaarkauluteng nangyuilngurmek.

²⁶Qessanqurrulria ellimertem̄inun cungarninarqellriatun qanrani, aruvagtun-llu iigkeni ayuquq.

²⁷Qigcikestai ATANREM unguvamaciqut, tau͡gken assiitellria yuk ak'anun unguvangaunani.

²⁸Neryuniurutait ellualriit angnimek iqungqertut, assiitellriit yuut camek neryuniurutaitut.

²⁹ATANREM camun pivkarngaitai canganarqutailnguut, tau͡gaam assiitellriit yuut piunrirciqai.

³⁰Ellualriit yuut nunamek au͡gaumangaitut, tau͡gaam assiitellriit yuut uitavikngaitaat nuna.

³¹Ellualria qalartelartuq umyuartulriartarnek, tau͡gaam iqluuryulria arulaircimaciquq.

³²Ellualriit yuut qaruyutnek qanllerkarteng nallunritaat, tau͡gken assiitellriit yuut akngirnarqelrianek yugnun qalarcugluteng.