Read Yupik Proverbs 12 Bible Online

Proverbs 12 - Yupik bible

Proverbs 12

¹Elisngayuumilriim ellangcautni ciuniularaa, tau͡gken kina ellangcautminek eq'ukilria usviinani.

²ATANREM ilukegcitkai assilriit yuut, assiilngurnek tau͡gaam picirkiuryulriit pinarqelriaruvkarciqai.

³Assiilnguum kina caceturrngaitaa, tau͡gaam ellualriit yuut pektayiiciiqut.

⁴Nuliaq nangrunailnguq uingan ucuryagutektua angniutekluku, tau͡gaam kasnguyugcecilria uiminek apqucitun mamyuilngurtun ayuquq.

⁵Elluararkanek umyuangcalartut ellualriit, tau͡gken elluanrilnguut ayuqucirtuutait aarnaqluteng.

⁶Qanellrit yuut assiitellriit tuqunarqelriaruut, tau͡gaam ellualriit qanllermegteggun aviucilartut yugnek.

⁷Assiitellriit yuut tuqulartut kinguvrunateng, tau͡gken ellualriit yuit kinguvengqerturatuluteng.

⁸Ellatulria yuk nanraumalartuq, usviilnguq tau͡gken caunrilkumaluni.

⁹Atawaunruuq angun yuk'egtaunrilnge'rmi pingnatunqellria angutmi ayuqucini anaggluku yuulriami amta-llu neqkaunani.

¹⁰Ellualriim yuum ungungssiutni elluarrluki auluk'larai, tau͡gken yuut assiitellriit nangciyugaqluteng pimeggnek.

¹¹Cumiggluni caliuralria nauceciiyurta neqkaucilartuq, tau͡gaam yuk caurailngaryulria usvitulriarunrituq.

¹²Assiitellriit yuut yuarturalartut assiilngurnek aturarkameggnek. Ellualriit yuut tuaten ayuqenritut.

¹³Assiitellria naptelartuq elliin qanllerminun, tau͡gaam ellualriit neguralaraat picurlallerkarteng.

¹⁴Nunuliutekan tusngauq qanllerpenun caliarpenun-llu; akurturciquten callerpet pitatiinek.

¹⁵Usviilnguum ayuqucia ellmini canganarqenrituq, tau͡gaam umyuartulria niicugnituuq ayuqucirtuumaaqami.

¹⁶Usviilnguq umyuani assiitaqan egmian nallunaitelartuq. Tau͡gken usvitulriim nakukumaaqami nallungualaraa.

¹⁷Iqluurpek'nani qalartellria nasvagilartuq piciulriamek, tau͡gken iqluquluni nallunairilria qalarciiquq piciunrilngurnek.

¹⁸Umyuarcurpek'nani yuum qanellri kiliqenglartut nuussirpagtun atunem kegginalegtun, tau͡gken umyuangcarraarluni qanelria qarucilriaruuq.

¹⁹Iqluurun ak'anun piuyuituq, tau͡gken piciulria piunriyuunani akwarpak.

²⁰Piciunrilngurmek umyualguut picirkiutulit assiitellrianek, tau͡gaam assilriamek picirkiutulit angniutengqerciqut.

²¹Assiitellriim tucuitai elluarrluteng yuulriit, tau͡gaam assiitellriit yuut picurlautait amllelartut.

²²ATANREM eq'ukai iqlungalriit, tau͡gken ilukegcitekluki qanllerteng aturluku yuulriit.

²³Umyuartulriit qarruteksuitaat nallunrilnguucirteng, tau͡gken usviilnguut paivcimaluku nallumalriarucirteng.

²⁴Cumiggluten caliurallerpegun yuut takaryaguciiqaatgen, qessanqurullerpet tau͡gken pistepayuurtelluten.

²⁵Umyuarniurpakaquvet angniiruciiquten, tau͡gaam qarucimakuvet angniriciquten.

²⁶Ellualria cuqnguarkauguq ilaminun, tau͡gaam assiitellriim yuum ilani eguaqularai iqlutmun.

²⁷Qessanqurrukuvet canek ayarilange'rpet piksagusngaitaten, tau͡gaam pingnatugluten pikuvet unangelarciquten.

²⁸Elluaryaraq tumyarauguq unguvamun, assiilnguq-llu tumyarauluni tuqumun.