Read Yupik Proverbs 15 Bible Online

Proverbs 15 - Yupik bible

Proverbs 15

¹Qanenqegcaarluni pilriim eq'uqerta nepailaraa, tau͡gaam kiucurlagalriim arcarivkalaraa.

²Umyuartulriit qanraqameng elisnganeq piyuuminarilaraat, tau͡gken usviilnguut qalartaqluteng caunrilngurnek.

³ATANREM tangvagai cat tamalkuita, tangvagluki assilriamek assiilngurmek-llu calilriit.

⁴Qanenqegcaarautet unguvavkarilartut, tau͡gken arivtellriim umyuaq navgularaa.

⁵Usviilnguum atami elitnaurutai caukenritai; ellangcautminek ciuniurilria ellangqellriaruuq.

⁶Ellualriit yuut avaliq'larait tukuuteteng, tau͡gaam assiilnguut cagmalarait piyunailngurmun tekitaqameng.

⁷Umyuartulriatgun sagtelartuq elisngayaraq, usviilngurteggun pivkenani.

⁸ATANEQ ilukegcilartuq yuut assilriit piicagaqata, tau͡gken eq'ukluku ekuagarkaq yuut assiitellriit taitellrat ellminun.

⁹ATANREM eq'ukaa ayuquciat assiitellriit yuut, kenkaqluki tau͡gken piciulriim aturtai.

¹⁰Assiilngurmek atuquvet mulngakevkenak anucimirqecetaarumaciquten; tuquciquten inerquasteten niisnganrilkuvki.

¹¹Tuqumalriit nunakengraatgu cat iirumasciigatut ATANERMUN tuani; qaillun tua-i nutaan yuum umyuami caliari Agayutmek iirciqaki?

¹²Ellmeggnek yuut pivakelriit ayuqucirtuyunaitut; umyuartunrulrianun-llu ellmeggni ayuqucirturcessngaunateng.

¹³Yuum angniutengqellra kegginaakun alaitelartuq, tau͡gaam angniitem navgumalaraa yuucia.

¹⁴Ellatulriit yuut elicunqelartut, tau͡gken usviilnguut elisnganrilnge'rmeng cangalliuyuunateng.

¹⁵Yuungnaqellrat nangteqellriit kesianek makugcarauguq, tau͡gaam angnirluteng yuulriit yuuciq angniutekaat.

¹⁶Assinruuq arrsaunge'rmi qigcikellra ATANREM tukuuluni arenqiallugten̄ermi.

¹⁷Assinruuq nerrleq naunrarnek ilakluki kenkek'ngat nerrlermi assinkacagarmek kemegmek ilaluni eq'ukutellrianek.

¹⁸Qenqercukaaralleq ayagniutngulartuq qanemyuugautellerkamun, tau͡gken qenqerrngiatneq uitanqegcinaqluni.

¹⁹Qessanqurrukuvet pisciigalliqelarciquten tamiini ayallerpeni, tau͡gken canganarqutaunak yuukuvet pisciigalliqelarngaituten.

²⁰Umyuartulriim qetunram atani angnircet'laraa. Usviilnguum tau͡gken aanani caunrilkaqluku.

²¹Usviilnguut yuut angniutek'laraat picirkartuyartellerteng, tau͡gaam usvitulriit assilriamek calituut.

²²Ayuqucirturilriartaitaqan picirkiurat piciurcuitelartut, tau͡gken ayuqucirturilriit amlleraqata piciurtaqluteng.

²³Angnirnarquq qanerkangqelleq nall'arusngalriamek yuut cayaraitnun.

²⁴Umyuartulriit yuut qulmun tumyaraq atularaat unguvamun, acitmun ayalria tuqumun aturpek'naku.

²⁵ATANREM piunrirciqai pivakellriit enait, tau͡gken qaillun pivkarpek'naku aipainrem nunautii.

²⁶ATANREM eq'ukai assiitellriit umyuat, ilukegciaqluni tau͡gaam yugnirqelriit qanellritnek.

²⁷Akingengnaqkuvet piciunrilngurkun enelgukaraten picurlagceciiqaten. Akiliutnek ciuniuriksaunak assiilnguum atullerkaanun unguvaniartuten.

²⁸Assilriit yuut umyuangcarraarluteng tau͡gaam kiulartut; assiitellriit kiuqayulartut, kiutait tau͡gaam picurlautnguaqluteng.

²⁹Assilriit yuut piicagaqata ATANREM niicugnilarai, tau͡gken assiilngurnun yaaqsilriatun ayuqluni.

³⁰Kegginamegteggun angnirluteng pilriit ilukegcivkalaraatgen, niitekegciaqavet-llu umyuan quyigikaniraqluni.

³¹Inerquuteten murilkekuvki umyuartulriaruuten.

³²Elitellerkan qessakekuvgu elpenek tau͡gaam akngirciiquten. Inerquun ciuniuquvgu umyuarturikanirciquten.

³³Qigcikellra ATANREM ayuqucirtuutnguuq umyuartunermun. Ellmikutuurpailegpet pikegtakumangaituten.