Read Yupik Proverbs 16 Bible Online

Proverbs 16 - Yupik bible

Proverbs 16

¹Wangkuta picirkiularyaaqukut, tau͡gaam Agayutem qanellra piugarkauguq.

²Yuk umyuarteqsaaqsartuq tamalkuan pillni assiryukluku, tau͡gaam ATANREM cuqingai umyuanguteten.

³Kaigavikiu ATANEQ picirkiuraten atawaqaasqesqelluki, nutaan elpet assirluki caliaqniaten.

⁴Cat tamarmeng ATANREM piliallri ciunerkangqertut; assiitellriit yuut ciunerkangqertut piunrillerkameggnek.

⁵ATANREM eq'ukai tamalkuita ellmeggnek ucuryagutekellriit; anagcessngaitai anucimirqecetaarumallerkaatnek.

⁶Piciuluten yuugi maligtaquuraulluten-llu, Agayutem assiilnguirniaraaten. Niisngau ATANEQ assiitellria elpenun pinritniartuq.

⁷Yuum ayuqucimikun ilukegcivkaquniu ATANEQ, inglukestain-llu uitanqegcillguteksuumirciqaat.

⁸Assinruuq carraungraan pinglleq iqlutun unakumanrilngurmek akingerpallermi iqlutun unakumalrianek.

⁹Picirkiurarkauyaaquten, tau͡gaam Agayutem piyullermikun pivkarciqaaten.

¹⁰Atanrulria qanlartuq pakmaken piyunarqucirluni; picirkiurai taumek piciurrlainalalriit.

¹¹ATANREM pisqutkaa uqamaltassiarcuutet cuqyutet-llu pitalqeggluki atulaasqelluki.

¹²Assiitqapigtellriaruuq atanrulriamun assiilngurkun calillerkaq, tua-i-wa elluaryaram atanirturilriit piningqercet'laaki.

¹³Atanrulria piciulriamek niiculartuq, ingluarvik'larciqai-llu piciulriamek qantulit.

¹⁴Umyuartulriim yuum atanrulria angnircetengnaqciqaa; ataneq eq'uqreskan iliit tuqunayukluku.

¹⁵Atanrem assikekii ayuquq amirlutun ellallugkatun up'nerkami, unguvanarqelriartangqerrluni tauna.

¹⁶Assinrurpagtuq umyuartunrem elisngam-llu pikellrak suulutaami qerrirlimi-llu.

¹⁷Elluarrluteng yuulriit ayalartut tumyarakun neguraluki assiitellriit; taumek ciunercurluten ayakina picurlanritniartuten.

¹⁸Ellminek pivaksaraq piunrillerkamek iqungqertuq, ucuryagcaraq-llu ciunerkarluni caunrilkumallerkamek.

¹⁹Assinruuq ellminek pivakenrilnguq arrsaulriit ilagarluki, ilaullermi ellmeggnek pivakelrianun teglegameggnek avgilrianun.

²⁰Qanruyutmek niitellria aturluku-llu piluaqerciquq, angnirciquq-llu kina imna cacetuqutengqellria ATANERMEK.

²¹Umyuartulria taqmigingalria yuk nallunrit'laraat taringumallrakun. Qanenqegcaarturallermikun maligcugnariinalartuq.

²²Umyuartuneq unguvanarqelriaruuq pikestem̄inun, tau͡gaam camek elicetengnaqellrat usviilnguut caurailngautnguuq.

²³Usvitulriit yuut umyuangcarraarluteng qanlartut; taumek qanellrat maligcugnarqenrulalria.

²⁴Yuum qanenqegcaarautai paatakaarngalngurtun ayuqut, neqniqluteng cali-llu tememun assirluteng.

²⁵Tumyaraq elpeni elluamun ayalria aipaagni tuqumun ayalriaruuq.

²⁶Calilria nerrlerkaminek umyuarteqluni piaqami cumiggluni calilartuq, tua-i-wa camirrluni neryuami.

²⁷Assiitellriit yuut nau͡gguitulartut akngirkengutekameggnek ilameggnun; qanllermegteggun-llu assiiluciat nallunaunani.

²⁸Yuut assinrilnguut sagcilartut qanerrlugnek; agyumciarautekiyulriim-llu yugnikutellriit eq'uyagucivkarluki avtelarai.

²⁹Aarilnguut yuut unayaq'larait yugnikekteng, picurlallerkaatnun tekicetaqluki.

³⁰Murilkici yugnek quuyuquluaralrianek, iiteng tuaten equtaarluki; assiilngurmek umyuangameng tuaten piut.

³¹Ellualriit nunuliutekaat unguvamallerteng; qiiteng-llu takarnarqutkelarait.

³²Qenqerrngiatelleq assinruuq artuqaitellermi. Assinruluni-llu elpenek nayumiqakuvet nunarpagnek atanirturillerkarpeni.

³³Yuut nall'arcetaariluteng nallunringnaq'laraat pisqutii Agayutem, tau͡gaam Agayutem elliin kiimi cam kiutii nallunrit'laraa.