Read Yupik Proverbs 17 Bible Online

Proverbs 17 - Yupik bible

Proverbs 17

¹Assinruuq nerrleq ciilereskiinek kelipamek umyuarniurutaunani, nerevkarilriani nerrlermi uitacurlagnarqelriit nuniitni.

²Pistem usvitulriim umyuani maligtaqungevkarciqaa atanemi yuk'egtaunrilngurmun qetunraanun, ciuniurarkaurrluni-llu paitarkain ilaitnek.

³Suulutaaq qerrirliq-llu pitassiarumalartuk kenerkun. Yuum ircaqrua ATANREM pitassialaraa.

⁴Assiilnguut yuut niicugnilartut assiilngurnek picirkiuranek, iqlungalriit-llu niicugnituluteng iqluurutnek.

⁵Picingssautek'laquvki arrsaulriit yuut, ilulnguvkaran Agayun piliaqestiit. Kia-llu arenqiallugtellra anglanitekekuvgu anucimirqecetaarumaciquten.

⁶Tutgaraat ucuryagutngulartut tegganernun, ataulriit takarnarqutngulauciicetun qetunrameggnun.

⁷Takaqumalriit yuut iqluyuitut, usviilnguut atuugarkamek qanerkaitelartut.

⁸Akiliun qarutaarutkun irr'inarqelrianek taqucugngaluku akiliritulim tuaten ayuqut'laraa; callermini tamalkuan unanguurutekluku.

⁹Yugnun kenkesqumakuvet au͡g'aritelarki assiilngurmek piaqatgen. Picurlautet umyuaqellrata yugnikutellret yugnikutenrircet'larai.

¹⁰Ayuqucingumalria yuk elitenrulartuq ellangcaqarraarutmikun usviilnguum elitellrani kaugtuarumakuni yuinarnek tallimarqunek (100).

¹¹Qanrucartulriatun niitniilngurmek tuqum tekiciqai assiitellriit yuut picurlagcetaarivakalriit.

¹²Assinruuq pairkenglleq taqukamek irniariumallermek pairkengllermi usviilngurmek yagarcetellriamek piciunrilngurnek.

¹³Akinaulaquvgu assilria assiilngurmek assiilnguum enen uitavikeciqaa.

¹⁴Qanemyuugautem ayagnera ayuquq mer'em capkutaan navkatallratun; taqevkarru arcarivailgan.

¹⁵Pinarqelriaruniluki pinarqenrilengraata, yuut-llu assiitellriit ilangciksaunaki; tamarmek eqnarqelriaruuk ATANERMUN.

¹⁶Usviilnguum akilirluni elitnaunge'rmi catekngaitaa, tua-i-wa umyugailami.

¹⁷Yugnikestemta kenkicirteng wangkutnek nasvagturalaraat. Anelgutkellriit arenqiallugtellermeggni ikayurtaagutenrilnguut catkatgu anelgutkucirteng?

¹⁸Yuk, umyugailkuni tau͡gaam, alla akqeciqaa akiilnguinek akiliriciiqniluni.

¹⁹Assiilnguum assikellra assikiyarauguq picurlautmek. Ucuryagpakaquvet picurlallerkarpenun tekiuciiquten.

²⁰Kina imna umyuarteqelria qalarrluni-llu assiitellrianek, aturngaitaa assilria picurlagnarqelria tau͡gaam.

²¹Angniitnarqelriamek iluteqnarqelriamek-llu aturarkangqertuq angun qetunralek picirkartulriamek.

²²Angnirluten yuullerpet temen segganqegcet'laraa. Angniipakalleq ayaniirutnarquq tuqumun ullautnguluni.

²³Assiitellriit cuqcistet akurtulartut akinek nalluvkarluteng, tua-i-llu ellualria cuqciyaraq pimavkenani.

²⁴Taringumalria yuk elluarrluni piyuumilartuq, tau͡gken usviilnguq picimitun ayagatuluni.

²⁵Usviilnguum qetunram angniicet'laraa atani, cakneq-llu ciinllugguaravkaraqluku aanani.

²⁶Atawaunrituq pinarqenrilnguq akilirivkarluku; cuqciyaraq piciungailan assilriit anucimirqecetaarumakata.

²⁷Qanllaganrilnguq yuk nallunrilnguuguq. Tatamallaganrilnguq-llu yuk taringumalriaruluni.

²⁸Yuk usviileng'e'rmi qaneni murilkelluku yuulria qanrutkumalartuq umyuartuniluku elisnganiluku-llu.