Read Yupik Proverbs 18 Bible Online

Proverbs 18 - Yupik bible

Proverbs 18

¹Yuut yugnikinrilnguut ilameggnek ellmeggnek arcaqakelriaruut; ingluliutelartut-llu allat piciukekaitnun.

²Usviilnguum tengrukenritaa taringumallerkani canek, tau͡gken elisngayukucimikun qalartaqluni.

³Assiilnguq kiaresngianarqelria-llu aipaq'lartuk. Takarnairuskuvet caunrilkumaciquten.

⁴Yuum qanellri ayagniutnguyugngaut umyuartunermun, imarpigtun et'utaluteng; nutaratun mertun ulvelriatun ayuqluteng.

⁵Assinrituq canrilkelluku assiitellria yuk, ellualria-llu assirluku pimasciigatevkarluku.

⁶Usviilnguum qanllermikun inglukun ayagnilaraa, ellminek kaugtuararkaurcetaqluni.

⁷Usviilnguq qanran navgularaa, qanllerminun ellii naptelaami.

⁸Qannguaryaraq neqniq'lartuq cakneq — igqallerkaanek mayiteq'lartukut!

⁹Qessange'rmi calilria cangallrunrituq navguiyulriami yugmi.

¹⁰ATANREM atra qimagviuguq asvaunani. Ellualriit qimalartut tuavet cavkenateng-llu.

¹¹Tukuulriit umyuarteq'lartut tukuuteteng cayailkutekluki, cavkanritnayukluteng qertulriatun nunarpiim casguitun.

¹²Yuk ucuryagtelartuq picurlagpailegmi, yuk-llu ellminek tau͡gaam pivakenriraqami takarnarituuq.

¹³Niicugnirraarluten kiulaqina. Tuaten pinrilkuvet usviituten tun'ernaqluten.

¹⁴Yuum umyuamikun cacetulriim naulluutni pellularaa, tau͡gken umyuamikun qamelria neryuniullerkairulluni.

¹⁵Puqilriit yuut elitellerkarteng tengrukaat.

¹⁶Yuut piuranrita iliit nallunriryukuvgu qacignarqenruciquq payuggluku pikuvni.

¹⁷Qanercetaarvigmi ciumek qanelria piciuluni pingatelartuq inglulirtiin apqaurpailgani.

¹⁸Pinilegglainaak yuuk inglukekunek qanercetaarvigmi, nall'arcetaariluteng arenqigiyaraat inglukutiik.

¹⁹Ikayulaquvni anelgutvet camun pivkarngaitaaten nunarpagni asvairqumalriani uitalriacetun, tau͡gken nakukelaquvni ikirtuqani palusngaciqai elpenun.

²⁰Yuugurallerpeni yuuciquten qanllerpet pisquciatun.

²¹Qanllerpegun unguvavkariyugngauten wall'u piunririluten; taumek elpet ciuniurarkaugan qanllerpet iqua.

²²Nulirkarpenek nalaquskuvet piluaqertuten; tuaggun nallunaituq ATANREM assilriamek calicia elpeni.

²³Arrsaulria qanraqami kaigalriatun pilartuq, tau͡gken tukuulria kiungami qancurlagaluni.

²⁴Yugnikek'ngat ilait piciuvkenateng pilartut, tau͡gaam yugnikek'ngat ilait anelgutemten̄i canimellrulartut.