Read Yupik Proverbs 19 Bible Online

Proverbs 19 - Yupik bible

Proverbs 19

¹Assinruuq arrsaunge'rmi piciulriakun pektellria usviinani iqlungalriami.

²Assinrituq yuk elisngamek piilkuni, cali nerinisngiatellerpet picurlallerkarpenun tekiuciiqaaten.

³Ilait yuut navgulartut ellmeggnek ellangcarpek'nateng yuullermegteggun, avalitekluku tau͡gken ATANEQ elliinun tuaten pivkarniluteng.

⁴Tukuulria yugnikestelingelartuq, tau͡gken arrsaulriit yugnikesterraita unitaqluki.

⁵Qanercetaarvigmi iqluulaquvet anucimirqecetaarumaciquten, nau͡gg'un anagvigkaiciiquten.

⁶Amlleret nakmikesqumalartut yugnun angenrukumalrianun, tamarmeng-llu yugnikek'ngaqnilaraat kina piluaqaasqutnek cikirturilria.

⁷Anelgutkeng'e'rmegteggu ilacuk'laraat arrsaulria, taumek yugnikestaitelalria kepqeng'e'rmi yugnikestekaminek.

⁸Elpenek ikayurluten elitengnaqi amllernek; nalluyagutenrilkuvki elitelten piluaqerciquten.

⁹Kina imna iqluulria qanercetaarvigmi anagngaituq anucimirqecetaarumallerkaminek, ciunerkangciquq piunrillerkaminek.

¹⁰Usviilnguut ayuqenritaat elluiluteng yuullerteng, teguat-llu atanirturillerteng yuut piuranritnek.

¹¹Ellangcarluni yuulria qenqerrngiatelartuq. Yuum iqlutun pikaten atawauciquq nallunguaquvgu.

¹²Atanrulria eq'uqertaqami ayuquq yugtutulitun uirranilriatun, tau͡gken piluaqaasqutii ayuqluni yukutartun can'get qaingatni.

¹³Usviilnguq qetunraq ataminek uayaarilriaruuq. Nuliaq-llu qanemyuugarturalria niitniinani kucirturalriatun ayuqluni.

¹⁴Enet tukuutet-llu kinguvanertaq'larait atameggnek, tau͡gaam ATANREM kiimi cikiryugngaa ellatulriamek nulirkaanek.

¹⁵Qessanqurruneq qavamun eguaquutnguuq. Qaciggluni yuulria kainiqciquq.

¹⁶Alerquutai ATANREM aturki unguvaniartuten. Kia imum caunrilkekuniki tuquarkauguq.

¹⁷Cikiqengaqavet arrsaulrianun ayuquten navriskengelriatun ATANERMUN, ATANREM-llu akilirciqaaten.

¹⁸Ellangcalarki irniaten elicugngallratni. Tuaten pinrilkuvki ikayurciqaten ellmeggnek piunrillerkaatnun.

¹⁹Qenqercukaaralriim elliin pikiurani aturciqaa. Picurlautiinek au͡g'arikuvet ataucirqumek nallunaituq cali pinqigciiqan.

²⁰Ayuqucirturilriit niicugnilaquvki elicuumilriaruuten, piinanerpeni umyuarturiciquten.

²¹Yuut amllernek picirkiurarkauyaaqut, tau͡gaam ATANREM pisqutii piugarkauguq.

²²Piciuneq yuut piyuumiutekaat ilameggnek; arrsaulria yuk assinruuq iqlungalriami.

²³ATANREM qigcikellra unguvamek iqungqertuq; yuum pikekuniu elluiluni uqiluni-llu uitaurciquq.

²⁴Yuut ilait qessanqurrum ugaani yagcuumiitelartut neqkameggnun.

²⁵Ellmeggnek pivakellriit anucimirqecetaarnarqut, yugnun umyugailngurnun eliyutkesqelluki.

²⁶Ataminek nangcilria aanani-llu eneminek anlluku, kasngunarqelriaruuq canganarqelriaruluni-llu.

²⁷Qetunramaa, eliquranermek taqkuvet nalluyaguciiqaten-llu ak'a elitelten.

²⁸Nallunritesta qanercetaarvigmi umyuarrliqkuni elluarrluteng pingaitut. Yuut assiitellriit pitassiarayulartut assiilngurmek.

²⁹Usviilnguq qutegngalria kaugtuarumaarkauguq.