Read Yupik Proverbs 21 Bible Online

Proverbs 21 - Yupik bible

Proverbs 21

¹ATANREM elucilirtularaa atanrulriim umyugaa kuiggaat elucililaucirmitun.

²Ca tamalkurmi elpet pillren elpeni assilaryaaquq, tau͡gaam ATANREM umyuan cuqingaa.

³Calian piciuvkarru pitalqegtelluku; ATANREM ilukegcitkenruaku cikiutni tuqutarkani.

⁴Assiitellriit yuut ellmeggnek ayuqucirkiurumalartut ellmeggnek pivakellermegteggun caunrilkillermegteggun-llu. Tamana-llu assiilnguuluni.

⁵Picirkiuraqluten cukangnaqevkenak enuqitenritniartuten; pilaagayukuvet enuqit'larciquten.

⁶Tukuuteten unakellrukuvki piciunrilngurteggun ak'anun pikngaitaten, ak'anivkenak tuqum agluqugkenun ayauciiqaatgen.

⁷Assiitellriit yuut aaritellrata piunriumai; piciulriim atullerkaa qessakngamegteggu.

⁸Assiilnguum aturtai tumengqertut caqialriamek; tau͡gaam ayuquciat menuilnguut piciulriaruuq.

⁹Assinruuq enem qaliqerrani uitalleq enem iluani uitallermi qanemyuugalriamek arnamek aiparluni.

¹⁰Yuut assiitellriit aturyugturalaraat assiilnguq; takumcuyuyuunateng ilameggnek.

¹¹Ellminek angekluni yuulria anucimirqecetaarumaaqan umyugailnguunge'rmeng eliyutkelaraat. Umyuartulria yuk elitnaurumaaqami elitelartuq.

¹²Agayutem ellualriim nallunrit'larai caurallrit yuut assiitellriit enemeggni, caunrillerkaatnun tekiuceciiqai.

¹³Arrsaulria ikayurcetaalria niicuumiilkuvgu, elpet-llu niicimangaituten ikayurcetaarluten qayagaunge'rpet.

¹⁴Iliita qenruskaten aassaqluten cikiquvni qenngenrirciquq.

¹⁵Cat elluaruciq aturluku pimaaqata assilriit yuut angnilartut, assiitellriit tau͡gken yuut nanikualuteng.

¹⁶Tuqum utaqaa kina imna avtellria ellatunermek.

¹⁷Elluiluni uitayaram wall'u wine-am, neqkaqegtaaraat-llu tukuurcessngaitaatgen.

¹⁸Assiitellrianun yugnun tut'elartuq picurlagcetaarutiit ilameggnun assilrianun yugnun.

¹⁹Assinruuq mertailngurmi nunami uitalleq uitallermi arnam qanemyuugarturalriim nuniini.

²⁰Umyuartulriit yuulartut tukuuluteng elluiluteng, tau͡gken usviilnguut akinguteteng egmianun unakaqamegteki nanglarait.

²¹Naklegtarluten iqluyuunak-llu yuugi unguvamaniartuten; allat-llu takaqeciqaatgen elluarrluten-llu piluten.

²²Umyuangayulriim anguyagtet ciuqliata teguyugngaa nunarpak anguyagtengqengraan pinilrianek, navgurluki casguit cacetuqutekellrit.

²³Picurlallerkan avicukuvgu qanellren mulngakekiu.

²⁴Nasviskuvnga ellminek pivakellriamek taunguuq caunrilkilria, ucuryagtellria, ilaminek-llu peng'garutailnguq.

²⁵Qessanqurrulria yuk caliyuumiinani, ellminek tuqutellriaruuq;

²⁶ernerpak umyuamikun ciknalartuq. Tau͡gaam ellualria cikirturilartuq qunuyuunani.

²⁷ATANREM eq'ukai yuut assiitellriit elliivikaqatni ekuagarkanek, arcaqerluku eq'ukaa elliitnek taiciaqata assiitellriamek taqutellerkarteng pitekluku.

²⁸Nallunairillra iqlungalriim ukvekumangaituq, tau͡gken qanellra yuum umyuangcarraarluni nutaan ciuniurumaarkauluni.

²⁹Ellualriit yuut ellmeggnek nalirrukenritut; tau͡gken assiitellriit yuut pinguarluteng pilartut pitacirmegcetun.

³⁰Yuum umyuartutacia, elisngacia, ayuqucingumallra-llu catngungaitut ATANREM ingluliqani.

³¹Uptarkauyaaqaci elussitaq anguyagnaluci, tau͡gaam cirlakiyaraq ATANREM pikaa.