Read Yupik Proverbs 22 Bible Online

Proverbs 22 - Yupik bible

Proverbs 22

¹Assilriakun niitnaullerkaq cucuknarqenruuq tukuutni.

²Arrsaulria tukuulria-llu uuggun tamarmek ayuquk: ATANREM piliaqellruak tamarkenka.

³Ellangqellriim yuum picurlallerkani tangerrluku aviciiqaa, tau͡gken umyugailnguum nalluciqaa aturluku-llu umyuarniurutkiurluni.

⁴Niisngaluku ATANEQ elpenek picalqukevkenak, tukuurrniartuten, takarnaqluten, unguvamaluten-llu.

⁵Unguvan qunukekuvgu ullagtaarutenrilu alarrnarqelrianun yuut assiitellriit pitaqestaitnun.

⁶Elitnaurru mikelnguq qaillun yuullerkaanek, nalluyagusngailaku unguvarmi taktaciatun.

⁷Tukuulriit ataniumalarait arrsaulriit, camek-llu navralria teguarurtelartuq navritestem̄inun.

⁸Nauvkarikuvet elluanricaramek quyurciciquten pilluggnarqellriamek, qenercaaqeng'e'rpet-llu kia catekngaitaaten.

⁹Qunuvkenak avguski arrsaulriit neqkautevnek. Tuaten pikuvet atawaqercecimaciquten.

¹⁰Ilaminek caunrilkuuriyulria anciu, kiutaagutellriit, nakukutellriit, arivutellriit-llu taqniartut.

¹¹Piyuumiutekekuvgu menuitellerkaq ircaqumikun unganaqluni-llu qallacaraq, yugnikestekciqan atanrulria.

¹²ATANREM murilkelaraa piciuyaraq, nasvallermikun iqlungalriit qanellrita piciunriluciat.

¹³Qessanquq yuk anyuumiitelartuq eneminek; qanerluni yugtutulimun piciqniluni ankuni.

¹⁴Assiitellriim arnam qanra petmigtun ayuquq; tuavet kina ATANREM qenruskii igciiquq.

¹⁵Mikelnguut ayuquciqaat picirkartuyartellerteng, tau͡gaam anucimirqevkarluki pimaaqameng niisngallerkarteng eliciiqaat.

¹⁶Cikiqenglaquvet tukuulrianek wall'u nangciluten arrsaulrianek tukuurtengnaqluten, elpet-llu arrsaurciiquten.

¹⁷Niicugni elicetnaamken umyuartulriit yuut qanellritnek. Elitnaurki ayuqucirtuutait,

¹⁸elpet-llu angnirciquten umyuaqekuvki qanruteksugngaluki-llu.

¹⁹Wiinga nallunricetanka elpenun unuamek cacetuquteksagutesqelluku ATANEQ.

²⁰Igautellruanka yuinaq qulnek cipluku (30) qaneryarat elpenun pikesqelluki. Imalguut elisngamek ayuqucirtuutnek-llu,

²¹eliceciiqaatgen piciulriim caqapiaraucianek. Ayagcecimakuvet tamana kangingnauresqelluku, utertesqelluten piciulriamek kiutiinek ang'aqluten.

²²Teglegiyaqunaku arrsaulria piyunalinge'rpet, piqayunaliteksaqunaki-llu qaillun pisciigalnguut qanercetaarvigmi.

²³ATANREM elliin anagyaaquciiqai akeqnerrluggluku-llu akeqnerrlugtestiit.

²⁴Yugnik'ngangqerrsaqunak qenqercukaaralrianek,

²⁵elicuaran ayuquciat eluciqsagulluku-llu.

²⁶Akqiksaunak allam akiilngui akilirciqniluki.

²⁷Akilirisciigalkuvet ingleten-llu tapqulluki uayarciqaatgen.

²⁸Nunam engeliin nallunailkutaa pekcecaqunaku ciuliarpet ellillra.

²⁹Tangertuten-qaa angutmek urenkelluni calilalriamek? Taum atanrulriit ilagalaryugngaciqai ilamini elluatuunruami.