Read Yupik Proverbs 26 Bible Online

Proverbs 26 - Yupik bible

Proverbs 26

¹Qaniqan kiagmi wall'u ellalliqan quyurciyaram nalliini, tuaten-llu ucurnarqun nall'arusnganrituq usviilngurmun.

²Aniqlaatem akngirrngaitaaten picetaallrunrilkuvet. Yaqulegtun ayuqut tengaurluteng kitulriatun mit'evkenateng.

³Piqrutat sugg'elitet-llu atulartut horse-aanun ciulvagnun-llu, tuaten-llu piqertuarnarquq usviilnguq.

⁴Kiuyaqunaku usviilnguq pitaciluku, elliitun ayuqliriyuartuten.

⁵Kiukuvgu caunrilnguq apyun ayuqiinek caunrilngurmek, aptelleq ellminek nallunrirciquq elisnganrilucirminek elisngayukluni umyuarteq'ngermi.

⁶Usviilngurmun kevgarturteskuvet cangallrunrituq it'gaten kepkuvki; picurlangnaquten.

⁷Piyuasciigalnguum irugketun agalriigtun atuuvkenatek, tuaten ayuquq qaneryaraq assilria usviilnguum qanrani.

⁸Nanrarilleq usviilngurmek ayuquq elluqutmun teggalquq qillrulluku pilriatun.

⁹Usviilnguq qanruyutnek qalareskuni ayuquq taangiqelriatun yaggluni arulacilriatun cukilananek.

¹⁰Calistekanek cucuklirilria usviilengraata taangiqsulangraata-llu cavkenani akngirqilriaruuq ilaminek.

¹¹Qimugtetun miryaminek nerelriatun, tuaten ayuquq usviilnguq picurlautminek ataam atulria.

¹²Tangertuten-qaa yugmek ellminek umyuartuyukellriamek? Usviilnguq yuk piluaqanruciquq elliini.

¹³Ciin qessanqurrulria eneminek anyuumiitelarta? Camek alinga? Yugtutulimek-qaa?

¹⁴Qessanqurrulria inglemini mumigtaalartuq ayuqluni ikirtuqatun arivnemikun tau͡gaam pektaalriatun.

¹⁵Ilait yuut qessam ugaani qessalartut neqkam qanmeggnun ellillerkaanek.

¹⁶Qessanquq umyuarteqciquq elisnganruyukluni malrunlegni yugni elluarrluteng nalqigcilriani qanllermeggnek.

¹⁷Qan'atarautellrianun ilagautellria pinarqenrilnge'rmi ayuquq tumyarakun ayainanermini qimugtem̄ek tegukengelriatun ciutegkenkun.

¹⁸Yuk usviilqik'ngelria ilaminek kinguakun-llu qanerluni picingssagluni piniluni, ayuquq ellangqenrilngurtun tegumialegtun caskumek aarnarqellriamek.

²⁰Keneq muraunani nipciquq; qanngualriartaitaqan inglukucaraq taq'lartuq.

²¹Kenqegcautem kangipluut kumavkalarai, muriit-llu keneq kumavkarluku; picurlagcetaarilriit-llu qanemyuugaucaraq eguaquutelaraat.

²²Qanerrluut yugmun neqnirqellriatun ayuqut, taumek yuum igqeryuumilaqai!

²³Umyuan assiilengraan assiruarluten qalareskuvet, ayuquten qevlercautetun minguusngalriatun akikilnguarmun qikumun egatmun.

²⁴Malrugnek umyualgem eq'ukutni iirumalaraa unganaqluni qanllermikun.

²⁵Qanellri assirngalengraata ukveksaqunaku, ircaqrua muirumiin eq'ukutmek.

²⁶Nallunarcararkauyaaqaa eq'ukillni, tau͡gaam yuut tangerciqait assiitellriit caliari.

²⁷Yuut ilameggnek picurlagcetaarilriit ellmeggnek pitaqeciqut. Yuut-llu ayagnirilriit elluugtelluku ellait elluuguceciiqut.

²⁸Eq'ukeken tau͡gaam akngirtengnaq'laran iqluurutekluku. Qanerkaiturpakalleq picurlagturainarnarquq.