Read Yupik Proverbs 28 Bible Online

Proverbs 28 - Yupik bible

Proverbs 28

¹Assiitellriit yuut qimalartut maligtestaileng'e'rmeng, ellualriit tau͡gken alinginateng yugtutulitun.

²Nunarpiim yui assiilngurkun pikata atanirturtai cimilguciqut. Tau͡gaam pinirarkauguq atanruvik piugurluni-llu elisngalrianek ellatulrianek-llu ciuliqagtengqerquni.

³Yuk atanirturilria arrsaulrianek nangcikuni ayuquq ellarvagtun piunririlriatun naucetaanek.

⁴Caukinrilkuvet inerquutnek assiitellriit yuut ililiraten; tau͡gaam alerquun niisngakuvgu assiitellriit yuut ingluliraten.

⁵Assiitellriit yuut nalluat elluarucim caucia, tau͡gaam ATANREM qigcikestain taringumaat elluarrluku.

⁶Assinruuq arrsaulria iqluyuilkuni tukuulriami iqluyulriami.

⁷Ayagyuaq niisngalria alerquutnek umyuangqellriaruuq. Tau͡gken ilagautellriim catngunrilngurnun kiaresngiacet'laraa atani.

⁸Tukuureskuvet yuut akilirarkaita ilangutaitgun wall'u usviilqiluki, tukuuteten piksaguciiqai arrsaulrianek takumcutalriim.

⁹Alerquutet atunrilkuvki, Agayutem eq'ukciqai niicuumiinaki piicauteten.

¹⁰Unayaqkuvgu ellualria assiilngirtelluku pitaqeciquten elpenek. Tau͡gken pinarqutailnguut amllermek kinguvanertarkangqerrluteng.

¹¹Tukuulriit umyuarteqsulartut usvitulriaruyukluteng, tau͡gken arrsaulriim taringumalriim ayuquciat nallunrit'larai.

¹²Assilriit yuut atanirturilriarurtaqata yuut angnilartut, tau͡gken assiitellriit atanirturilriarurtaqata yuut iiraqluteng.

¹³Aassaqutekilria assiilnguminek piluaqerngaituq, tau͡gaam apervikuatekekuniki peggluki-llu naklekumaciquq.

¹⁴Atawaqertuq yuk qigcikestii ATANREM kesianek. Pamailnguq yuk picurlallerkaminun tekiuciiquq.

¹⁵Arrsaulriit yuut casciigat'lartut atanirturtengqerraqameng assinrilngurmek; alingnarqelaami ayuqluni uirrelriatun yugtutulitun, nerangnaqellriatun-llu taqukatun.

¹⁶Ellatunrilnguq atanirturikuni nangcilriaruciquq. Tau͡gaam piciunrilngurkun akingengnaqsaram eq'ukestii atanirturiciquq ak'anun.

¹⁷Yuk tuqucillrukan yuullgutminek, qimagauvkaqiciu tuqunatkaanun, ikayuryaqunaciu.

¹⁸Iqluuqsaunak cavkenak uitaniartuten. Iqluuryukuvet alqunaq piunrirciquten.

¹⁹Nauceciiyurta qacigcuilnguq neqkaucilartuq. Tau͡gken yuut caurailngarpakalriit arrsauciquq kesianek.

²⁰Asguranarqevkenateng yuulriit angnirluteng yuuciqut, tau͡gaam yuk cukamek tukuurtengnaqellria anucimirqecetaarumanrilngaituq.

²¹Yuut ilaitnek ingluarvikillerkaq assinrituq. Tau͡gaam ilait carraungraan nunuliutseng assiitellriakun pilartut.

²²Qunutungalria yuk cukamek tukuurtengnaq'lartuq nalluluku enuqitnamun tekiartellerkani.

²³Yuk inerquagilria kinguakun pikegtakumanruarkauguq qanmikun unganarqengnaqellriami.

²⁴Kina imna canricukluku umyuarteqellria tegliungermi angayuqaagminek, cangallrunrituq teglengalriami yugmi.

²⁵Qunutungalleq picurlaganarqelartuq tau͡gaam. Assinruciquq cacetuqutekekuvgu ATANEQ.

²⁶Usvitulriarunrituten umyuan aturluku yuukuvet. Assinruciquq umyuartunrulriim ayuqucirtuutii maliggluku pikuvet.

²⁷Cikiqenglaquvet arrsaulrianek camek piyuumirngaituten. Nallunguaquvki arrsaulriit aniqlaamaciquten amllernek yugnek.

²⁸Yuut iiralartut yuut assiitellriit atanirturilriarurtaqata. Tau͡gaam piunriraqata, ataam ellualriit atanirturilriarurtelartut.