Read Yupik Proverbs 29 Bible Online

Proverbs 29 - Yupik bible

Proverbs 29

¹Niicuirusngiinaquvet nunurcilangerpet, piunrillerkarpenun anirturviirulluten tekiararuqurainarciquten.

²Atanirturilriartangqerraqan ellualrianek yuut angnilartut, tau͡gken cali assiitellria yuk atanirturian mayiteqluteng.

³Quyakekuvgu ciuniurluku umyuartuneq, aatan quyavkarciqan. Yuk akissunun ullagatellria caangualartuq atu'urkaminek.

⁴Atanrulriim elluaruciq piyuumiutekaqaku atanruvik asvaitelartuq, tau͡gaam akiyunqellriarukuni nunani cairuceciiqaa.

⁵Yuk nunalgutminek nanrarilria assikesqelluni, kuvyirtuq it'gami napvigkaitnek.

⁶Assiitellriit yuut naptelartut ellaita assiilngumeggnun. Piciulriit tau͡gken angnituluteng camek-llu nagutaunateng.

⁷Ellualriim yuum nallunritaa arrsaulriit piyunarqucingqerrarkauciat. Assiitellriim yuum taringumanritaa mat'umek nallunritlerkaq.

⁸Yuut ilameggnek pikegtakinrilnguut nunarpak tamalkuan nep'ngevkalaraat. Umyualget neplirceciyuitut.

⁹Umyuartulriim yuum usviilnguq kiutaaraqani, taum ciunran engelarautek'laraa tau͡gaam, qanpagaluni tuaten.

¹⁰Tuqutarayulim eq'uk'laraa pinarqutaunani yuulria, ellualriit tau͡gken taum picurlanritlerkaanek murilkelluteng.

¹¹Usvitunrilnguum yuum qenqertellni aaryugpek'nani antelaraa, tau͡gken umyuartulriim pileryagutekevkenaku nuqingalaraa.

¹²Atanirturilria niicugnilaquni piciunrilngurnek qanrutaqatni, atanerruari-llu tamarmeng iqlungalriaruciqut.

¹³Arrsaulria nangtesten̄i-llu uuggun ayuquk: iingqertuk tamarmek cikiutmegnek ATANERMEK.

¹⁴Atanrulriim anagyaaqut'laquniki arrsaulriit ak'anun atanirturiarkauguq.

¹⁵Inerquagiyaraq ellangcariyaraq-llu assirtuq mikelngurnun. Mikelnguum umyuani atuquniu aanaminun kasngukevkarciquq.

¹⁶Assiitellriit atanirturiaqata inerciigacaraq paivngalartuq. Ellualriit tau͡gaam unguvaciqut tangerrluki-llu tuaten ayuqellriit au͡gaumakata atanirturillermeggnek.

¹⁷Ellangcalarru qetunraan uitanqegcivkarniaraaten kesianek. Umyuarpegun quyavkalarciqaaten.

¹⁸Qaneryaramek qalarutestailkuneng yuut umyuarteng maligtaquarkaugaat, tau͡gaam atawaqertuq atulria Agayutem alerquutainek.

¹⁹Pista qalarutqainarluni anucimiqngaituq, tua-i taringeng'e'rmi maligarusngailami.

²⁰Anagvingqenruuq umyugailnguq yuk yugmi qanlaagayulriami umyuangcarpek'nani.

²¹Cikilaquvni pisten canek tamalkuitnek piyullrinek mikelnguurraanranek, iquani piuteten tamalkuita piksaguciiqai.

²²Yuut qenqercukaaralriit ayagnercilartut qanemyuugaucaramek picurlagmek-llu.

²³Elpenek pivakellerpet pikegtakumavkarngaitaaten, tau͡gken elpenek pivakenrilkuvet takaqeciqaatgen.

²⁴Tegliulriim tegliullermini aiparruani arcaqerluku inglukestekaa. Anucimirqecetaarumaciquq qanercetaarvigmi piciulriamek qanquni, Agayutem-llu aniqlaaciqaa piciulriamek qanenrilkan.

²⁵Aarnarqeciquq umyuarniurutkekuvgu qaillun allat umyuarteqellrat elpenek, cacetuqutekekuvgu ATANEQ qaillun pingaituten.

²⁶Tamarmeng yuut nakmikesqumalartut atanirturilriamun, tau͡gaam ATANERMEK kiingan elluamek akurturciquten.

²⁷Ellualriit eq'ukait assiilnguut yuut, assiilnguut-llu yuut eq'ukluki ellualriit.