Read Yupik Proverbs 3 Bible Online

Proverbs 3 - Yupik bible

Proverbs 3

¹Qetunramaa, nalluyagucaqunaki elitnaurutenka; qemangqakiki tau͡gaam ircaqurpeni.

²Unguvamavkarciqaatgen enuqitessngaunak-llu.

³Piciuneq naliruggnaitneq-llu cakaaryaqunakek; uyamiksaguskek, igaullukek ircaqurpenun.

⁴Nutaan pikegtakluten pivakluten-llu tangvagniaraaten Agayutem yuum-llu.

⁵Cacetuqutekiu ATANEQ pitacirpetun. Umyuan nakerrsukevkenaku.

⁶Callerpeni tamalkuan ellangcarvikluku ATANEQ, tumkegcivkarniaraaten.

⁷Umyuartuyukluten umyuarteqevkenak; qigcikluku ATANEQ assiilnguq atunrirru.

⁸Tuatnakuvet temen iinrulriatun piciqan, ekiten mamluteng nerpenek-llu akngirniunrirluten.

⁹Takaqillren ATANERMEK nasvaggu elliivikluku assinqurritnek naulrianek naucetaarvigpeni.

¹⁰Nutaan qemaggviten piviiruciiqut, wine-amek-llu caquteten qageryukaarangluteng imartum ugaani.

¹¹Qetunramaa, caunrilleksaqunaku ellangcautii ATANREM; murilkenqegcaarqina aarcirtuutngulriatun-llu akurturluku.

¹²Tua-i-wa ATANREM nunulaaku kenkekni, aataulriim nunulauciatun irniani kenkekni.

¹³Angnirciquq yuk umyuartuneq piksaguskuniu, taringyuyaram-llu pikliutestii.

¹⁴Unangvikellra assinruuq unangvikellrini qerrirlim suulutaam-llu.

¹⁵Umyuartuneq piksuuminarqenruuq teggalquqegtaarni; ayarik'lallerpet-llu tamarmeng pitacirciigataat.

¹⁶Umyuartunrem manamaarturaaten unguvamallerkamek, tukuullerkamek, pikegtakumallerkamek-llu.

¹⁷Umyuartunrem ilukegcivkarciqaaten, aarnailngurkun-llu pekyulluten.

¹⁸Piksagutestai unguvamek pinglartut, qelkestai-llu angnilrianek aprumalartut.

¹⁹ATANREM umyuartutacimikun piliaqellrua nuna; elisngallni-llu aturluku enekaanun ellillruluku qilak.

²⁰Umyuartutacian kuiget carvangevkallrui, amirlut-llu ellallircetaqluki.

²¹Qetunramaa, umyuartullren ellatullren-llu avaliqu'urqikek. Tamariyaqunakek.

²²Yuucin unguvavkarciqngan'gu tangnircautngulutek-llu uyaqurpenun.

²³Tumyarakun aarnailngurkun ayagniartuten, paallaksaunak.

²⁴Inareskuvet camek alingengaituten, qavaquvet-llu qavaryugluten unugpak.

²⁵Umyuassuugaryaqunak nanikuallagallerkamek, yuut assiitellriit pilauciicetun tut'aqaceteng alqunarluki.

²⁶ATANREM camun pivkarngailaten, picurlallerkarpenun-llu tekicessngaunak.

²⁷Assilriamek calillerkan yugnun pinarqellrianun pinriteksaunaku piyugngaaqavet.

²⁸Nunalguten ikayurcetaalria unuaquteksaunaku ikayuutekaanek avalingqerquvet.

²⁹Umyuarrliquteksaunaku nunalguten canivni uitiin cacetuqutekluten.

³⁰Inglulirtuuteksaunak yugnun camek pitkaunak, qaillun piksailkaten.

³¹Ayuqniaryaqunaku yuk pillagayulria wall'u cucuksaqunaku ayuqucia.

³²Agayutem eq'ukngaki yuut assiilnguum aturtai, ellualriit tau͡gken camek aassaqucuunaki.

³³ATANREM aniqlaamai yuut assiitellriit enait, tau͡gken atawaqercecimaluki ellualriit enait.

³⁴Caunrilkilriit caunrilkai, nakmikluki tau͡gken ellmeggnek pivakenrilnguut.

³⁵Umyuartulriit piksaguciiqaat takarnarqun, usviilnguut tau͡gken pikangqerrluteng kasngunarqelriamek.