Read Yupik Proverbs 30 Bible Online

Proverbs 30 - Yupik bible

Proverbs 30

¹Makut qanelqai Agur-am, Jakeh-m qetunraan: “Agayutem nayunritaanga, wiinga-llu qaillun pisciiganii.

²Usviitqapigcama yugmek aprumacirkaunii; yuum taringumayaraanek piinii.

³Eliteksauni-llu umyuartunermek, Agayutmek-llu nalqapigglua.

⁴Kina qilagmiutarnek elisngalriarua? Kia-llu unatminun anuqa quyurtellruagu? Wall'u meq imgulluku 'lumarrarmun? Elkarrluki-llu engelai nunam? Kituuga? Kituuga-llu qetunraa?

⁵“Agayutem akqutni tamalkuita atularai. Capkutauluni-llu ellminun qimalrianun.

⁶Qanellri ilayaqunaki qanelqenrilkainek, nunurciqaaten iqluullren-llu nallunairluku.”

⁷Kaigavikamken cikiisqellua malrugnek piyuutemnek tuquvailegma;

⁸iqluurcecaqunii, tukuuvkaryaqunii arrsauvkarpek'nii-llu. Tau͡gaam neqkamnek cikirnga aturyullrenka anagtevkenaki.

⁹Camireskuma mecirauteksuamken qanerlua, “ATANEQ cauga?” wall'u arrsaukuma tegliuryuartua, caunrilkevkarluku Agayutma atra.

¹⁰Qannguaruteksaqunaku cangakuurluku pista atanranun, aniqlaayuaraaten pinarqelriarurtelluten-llu.

¹¹Ilaita yuut aniqlaayularait atateng aanameggnun-llu quyallerteng nasvayuunaku.

¹²Yugtangqertuq-llu umyuarteqelrianek menuicukluteng amta-llu eruumavkenani pellernarqellrat.

¹³Yugtangqertuq-llu ellmeggnek arenqianateng assiryukellrianek, umyuameggni assirtataunateng.

¹⁴Yugtangqertuq-llu nangciluteng arrsaulrianek enuqitellrianek-llu usviilqilrianek, yuungnaqutekluku tamana tuaten piyullerteng.

¹⁵Payaqcaarta malrugnek paningqertuq tamarmek aterlutek “Cikirnga.” Cetamaugut piyullermeggnek mayitequralriit:

¹⁶tuqu, arnaq irniarilnguq, nuna kinreskii ellallugmek kepqellria, eka-llu ayulria.

¹⁷Kina imna picingssautekilria ataminek wall'u caunrilkilria aanaminek niicugpek'naku arnaurtellrani, tulukaruut iingirciqaat vulture-aat-llu[1] nerluku.

¹⁸Cetamanek pitangqertuq wangni ayuquciitnarqelrianek taringesciigalkemnek:

¹⁹meterviit tengaulallrat pagaani, qaillun ciissirpiit pektelallrat teggalqum qaingakun, sun'at tumkarteng nalluvkenaku imarpigkun ayallrat, kenkutqerraarutiik-llu arnam angutem-llu.

²⁰Waten arnaq allaliutuli ayuquq: akusrarutekevkarraarluni maqilartuq, qanerluni-llu, “Wiinga assiilngurmek atuqsaitua!”

²¹Cetamanek pitangqertuq nunam mat'um ciuniurciigalkainek:

²²teguam pistem atanrurtellra, usviilnguq neqkaminek nuryugcinrilnguq,

²³eq'utalriim arnam uingellra, pista-llu arnaq enaiqengelria pistekestem̄inek arnamek.

²⁴Cetamanek ungungssiartangqertuq ellarpagmi, mik'ngermeng tau͡gaam usvituluteng:

²⁵Negairngalnguut: piniacaaqut tau͡gaam quyurtelartut neqkameggnek kiagmi.

²⁶Uiret: pinipianricaaqut tau͡gaam igtengqerraqluteng teggalquni.

²⁷Petgertayulit: atanricaaqut tau͡gaam ayagatuut tungliqutacirluteng.

²⁸Peleqpelrarngalnguut: tegumiaqsugngaluki unatevni, tau͡gaam tangrruulartut atanret enaitni.

²⁹Cetamanek pitangqertuq ucurnarqellriatun piyuallrat ayuqluni:

³⁰yugtutulit, pininkacagait ungungssiaraat camek alikek'ngaunateng;

³¹qusngirngalnguut, kuulicaat angucaluit, atanret-llu yum'eng ciuqerratni tarritellriit.

³²Umyugaitetacirpeni elpenek angkellrukuvet, umyuangcarluten-llu assiilngurmek taqutellerkarpenek, arulairluten umyuangcaa!

³³Muluk'uuq akuskuvni masslaurciiquq. Kina-llu qengaakun agtullakuvni kakegciiquq. Eqcetaarikuvet picurlallerkarpenun elpenek tekiuciiquten.