Read Yupik Proverbs 6 Bible Online

Proverbs 6 - Yupik bible

Proverbs 6

¹Qetunramaa, akqikuvet yugmek akiilnguirciigalkan akiilnguiruciciiqniluku,

²qanllerpegun elpenek pitaqluten, akqillren avitesciiganaku.

³Waten pikina pegcetengnaqluten tamatumek akqillerpenek, tua-i taum akqellerpet caviirumalriatun ayuqngaten.

⁴Qavaryaqunak, mernuinerciryaqunak,

⁵qanllerpegun picurlallerpenek anangnaqi yaqulegtun ungungssiartun-llu anangnaqellriatun pissurtem̄inek.

⁶Negairngalnguut paqeski qessanqurrukuvet, murilkiu ayuquciat elilluten-llu ellaitnek.

⁷Ciuliqagtaunateng, atanirturtaunateng, ayuqucirturtaunateng-llu,

⁸tau͡gken neqauceteng qemagtelarait kiagmi, uksuq upyulluku.

⁹Qakurpak tuani taklaqatarcit qessanqurrulriami? Qaku tupakatarcit qavallerpenek?

¹⁰“Carrarmek qavaqerciqua mernuinerciqerlua,” tauna qanertuq.

¹¹Qavainanerpeni arrsiteqsaram tekiciiqaaten yugtun caskirluni tegliuryulriatun.

¹²Catngunrilnguut assiitellriit yuut tarratelartut yuullguteteng iqluurluki.

¹³Iigmiuqaquluteng elucira'arluteng ukvercecingnaq'lartut.

¹⁴Umyuarrliqngameng umyuangcarluteng assiilngurnek, kesianek uitacurlagcetaariluteng.

¹⁵Taumek pillugnarqelria tut'arkauguq ellaitnun alqunaq, ekiliumaluteng mamngailngurmek.

¹⁶Arvinelguut eq'ukek'ngai ATANREM, malrunelgen pellernarqellriaruluteng elliinun: ucuryagtellria, iqluuryulria, tuqucilalriit pinarqutailngurnek, umyuangcatuli assiilngurmek picirkiurluni, assiilngurmek pinaluni ullagaruculria, nallunritesta iqluyulria, yugnikutellrianek picurlagcetaarilria.

²⁰Qetunramaa, niisngaki atavet inerquutai, cakaarpek'naku-llu aanavet elitnaurutii.

²¹Ircaqurpeni qemangqaurluki uyamikuralriatun.

²²Ayakuvet natmun ciuliqagciiqaatgen, qavaquvet qaunqelluten, tupakuvet-llu qalarulluten.

²³Alerquun kenurrauguq, elitnaurun-llu tanqiuluni, ellangcautaita eliceciiqaatgen qaillun yuullerkarpenek.

²⁴Arnamun assiitellriamun alarcetesqevkenak unayaqengraaten unganaqluni.

²⁵Aglumayaqunaku kenegnangraan, iigmiungraaten-llu maligarucaqunak.

²⁶Angutem akissuq piyugngaa kelipam akikanranek akilirluku, tau͡gaam akusrarutekillermikun pini tamalkuita cagmarciqai.

²⁷Angun-qaa kenermek manuminun elliikuni, aklui-qaa ekuangaitut?

²⁸Wall'u kumalriatgun kangiplugteggun piyuakuni it'gai-qaa uusngaitut?

²⁹Tuaten pilartuq angun allat nulirritnun ullagatellria, anucimirqecetaarumanrilngaituq.

³⁰Yuut cangakngaitaat teglengalria teglekan kaillni pitekluku;

³¹tau͡gaam angukatni akiliriarkauguq tegullmi malrunlerqunek amllertataitnek, piutni tamalkuita enemini akiliutekciqai.

³²Tau͡gaam angun arnamek akusrarutekilria usviituq. Tuaten pilria ellminek piunrilartuq.

³³Nangcimaciquq pikegtakumanrirluni-llu, kiaresngianarqelria-llu elliinek au͡g'arngaunani.

³⁴Tua-i-wa angun qungyaquni cakneq qenerciiqngami, takumcuyugngaunani-llu akinauquni.

³⁵Akimek manamaartung'e'rmi ciuniurngaitaa, canek-llu amllernek cikirtung'erpeni catekngaunaki.