Read Yupik Proverbs 7 Bible Online

Proverbs 7 - Yupik bible

Proverbs 7

¹Qetunramaa, qanellrenka neq'akiki, nalluyagucaqunaki.

²Qanelqa maligtaqukiu, unguvaniartuten. Iigken camun pivkaryaaqenrit'laucirpetun, tuaten mulngakluten aturniaten qanruyutenka.

³Ayuqucirtuutekellrenka avaliqu'urki, igaulluki ircaqurpenun.

⁴Umyuartuneq alqaqellriatun nayagaqellriatun ayuqulluku, ayuqucingumayaraq-llu yugnikestekellriatun ellirluku.

⁵Ullagatessngaitaagten allat nulirritnun, arnanun-llu unganaqluteng unayaqengraatgen.

⁶Caqerlua enema egalrikun qinengqainanemni

⁷tangertua usvituriksailnguut ayagyuat akuliitni arcaqanruluni usviillrulriamek yun'erramek.

⁸Tumyaratgun ayagluni taum arnam eniin tungiikun. Kituqatarluku taum arnam enii

⁹atakumi tan'gerillrani.

¹⁰Tua-i-llu arnam taum pairrluku akissum aturainek aturluni, umyuamikun picirkiurluni.

¹¹Tauna arnaq takaunani, kasngukevkenani ellminek, enemini-llu uitayuunani;

¹²calligtaarluni tumyarani, tuneniarvigni, enet kangiraitni, utaqalgilartuq.

¹³Taum arnam yun'erra'ar akuqerluku melugaraa takaryugpek'nani-llu qanrulluku,

¹⁴“Elliillruunga unuamek, kemgutengqertua elliitellma ilaitnek.

¹⁵Taumek anelrianga paiqernaluten. Tengrulua yuaryullruamken, waniwa-llu nalaqluten.

¹⁶Ingelrenka qallilillruanka tangnirqellrianek 'lumarrarnek Egypt-aarmiiutarnek.

¹⁷Tepkegcarluki-llu ayuqenrilngurnek tepkegcautnek myrrh-amek, aloe-mek, cinnamon-aamek-llu.

¹⁸Tailuten angnirlunuk aipaqnaurtukuk unugpak.

¹⁹Aipaqa maantenrituq, yaaqvanun ayallruuq.

²⁰Akinek amllernek ayaulluni ayallruuq uterrngaunani malruk nitilik nalliigni.”

²¹Aglumanarcarluni qalarrluni unakaa.

²²Yun'erraam-llu maliggluku egmian ayagtuq kuluvagtun tuqucimallerkaminun wall'u tuntuyagartun pitaqumallerkaminun ayalriatun,

²³tuani pitegcaun ircaquanun kapuciiqluni. Yaqulegtun ayuquq kuvyam tungiinun ayalriatun nalluluku tuqullerkani.

²⁴Taumek qetunramaa murilkelluten niicugninga.

²⁵Tuaten arnamun ayuqellriamun unakevkaryaqunak, tumyarai-llu caqirrviksaqunaki.

²⁶Angutnek amllernek alarcecilriaruuq, tuquvkarluki naaquciilnguut.

²⁷Taum arnam enii tumyarauguq camavet tuqumalriit nuniitnun.