Read Yupik Proverbs 9 Bible Online

Proverbs 9 - Yupik bible

Proverbs 9

¹Umyuartuneq ellminek eneliuq naparyirluku malrunlegnek.

²Tuqucivkallrui ungungssimek nerevkaritekaminek, tepkegcilrianek-llu wine-aq avuluku estuuluq uptaa.

³Ellimerrai-llu neviarcat pisten̄i nunat qertunratnun piluki qayagauresqelluki,

⁴“Taici nallumalriani yugni!” Usviilngurmun-llu waten qanerluni,

⁵“Tailuten neryarturki neqkiuranka merluku-llu merkiuralqa avumalria wine-aq.

⁶Nallumalriit ilagarpek'naki unguvaniartuten, elisnganeq tau͡gaam cucukluku.”

⁷Inerquakuvni ellminek pingakellria arivciiqaaten. Akngirciiquten-llu tau͡gaam qalarucaaqekuvgu yuk assiitellria.

⁸Kitugutkaanek qalarucaqunaku ellminek pivakellria; tauna pitekluku eq'ukciqaaten. Umyuartulriim tau͡gaam qalaruskuvni qigcikciqaaten.

⁹Ayuqucirtuakuvni umyuartulria umyuarturikanirciquq; elitnauquvni-llu ellualria yuk elitekanirluni.

¹⁰Qigcikellra ATANREM ayagniutnguuq umyuartunermun, nallunritellra-llu Tanqilriim ayuqucingumayarauluni.

¹¹Umyuartunrem ilaciqai erenret allrakut-llu yuullerkaten.

¹²Umyuartukuvet umyuartullren elpet piluaqautekciqan, caunrilkikuvet elpenek nangtequtekiurciquten.

¹³Usviicaraq ayuquq arnatun neptulriatun takaryuyuunani.

¹⁴Aqumgalartuq enemi ikirtuqaan caniani, nunat-llu qertuqratni,

¹⁵qayagaurluki yuut kitulriit caliateng urenkelluki:

¹⁶“Iterci enemnun nallumalriani yugni!” Usviilnguut-llu waten qanrutaqluki,

¹⁷“Teglegaq meq neqnirquq. Teglegaq-llu kelipaq neqnirqenruuq.”

¹⁸Yuut tau͡gaam nalluat eniinun itellriit tuqulauciit, itellret-llu ak'a uitanguciat tuqumalriit nuniitni.