Read Yupik Ecclesiastes 10 Bible Online

Ecclesiastes 10 - Yupik bible

Ecclesiastes 10

¹Tepkegcautem imaa tamalkuan ciiviit tuqumalriit narniirut'laraat, ellma-llu usviilkarteqallrem au͡g'aryugngaa angtuaq umyuartuciq.

²Nutem ayuquciqaa umyuartulriim assilriamek atullni cali-llu umyugailnguut iqlumek atulteng.

³Pairtestainun tumyarani allanrung'e'rmeng nallunaitelartuq usviilucia; usviitellerteng manimalaraat yugnun tamalkuitnun.

⁴Atanirturtevvet qenqerruskaten taq'lerturyaqunak; arcaqalriamek alartellerpenek aviusngaciquten qinuunak pikuvet.

⁵Wani-wa atawaunrilnguq tangelqa maani nunami—atawaunrilnguq atulaq'ngaat ataniurilriit.

⁶Usviilnguut quyilrianek caliarkicimalartut, tukuulriit tau͡gken nallunguarumaluteng.

⁷Tanglartua-llu pisten̄ek horse-aatgun eglertellrianek, tau͡gken takarnarqellriit ciulirneret piyualuteng teguatun pistetun.

⁸Elakuvet petmigmek, ek'arciiquten; qacarnerkun navguskuvet, ciissirpiim keggsugngaaten.

⁹Calikuvet teggalquliurvigmi, akngircimayugngauten teggalqutgun. Qupurikuvet muragnek, cali akngircugngauten.

¹⁰Piqertuutan ipgialkan ipegcayuilkuvgu-llu cakviuvsiarluten aturciqan. Ciunguluku aptelleq umyuartunrunarquq.

¹¹Angalkumirtaatukuvet ciissirpak qaillukuarluku camek tamana unangutekngaitan ciumek keggevkaquvet.

¹²Umyuartulria qalartellmikun qigcikumalartuq, tau͡gken usviilnguut qanaallrata caunrilarait.

¹³Ciumek qalartellri qannguarulartut iqungqerraqluteng arcaqalriamek usviilliqutmek.

¹⁴Usviilnguq qalarrngiinalartuq. Kia nallua ciunerkani, kia-llu nalluluku qaillun pillerkani tuqurraarluni.

¹⁵Kina imna usviicessiyaagluni kinguneminun utertellerkani nalluyagutellria taqsuqcirluni cakneq calilartuq.

¹⁶Nunarpiim yui arenqiallugciiqut atanengqerquneng ayagyualriamek, ciuliqagterluteng-llu unugpilalrianek nerluteng.

¹⁷Tau͡gaam nunarpak piluaqertuq atanengqerquni takarnarqellriamek, ciuliqagtai-llu pinariaqan ner'aqluteng, nerrlerteng pinircautekluku taangiqsulriaruvkenateng-llu.

¹⁸Qessamkaussiyaagluten enem qilii kitugcuilkuvgu, kucingeciquq, kiituani-llu ena imciquq.

¹⁹Kalukami neryaraq nunaniryuutnguuq wine-aq-llu angniqagutnguluni, tau͡gaam tamarkegenka aturciigatagken akiutaunak.

²⁰Umyuarpegun kiingan ping'e'rpet cangakuuryaqunaku atanrulria, cangakuuqsaunaki-llu tukuulriit, enevni qavarvigpeni (niitarkaunrilengraatgen). Aipaagni yaqulecuaraam niilluten qanrucuarai qanllerpenek.