Read Yupik Ecclesiastes 2 Bible Online

Ecclesiastes 2 - Yupik bible

Ecclesiastes 2

¹Umyuamkun picirkirtua anglaningnaqu'urlua yuunalua, yuvrirnaluku angniryaram caucia. Tau͡gaam taringaqa tamatum-llu caunritellra.

²Nallunriraqa engelallagayaram caunrilucia, anglaniyaraq-llu catnguvkenani.

³Umyuarturiyugyaaqellma umyuangevkaraanga wangnek angnirivkangnaqnalua mer'alua wine-amek anglaninalua. Umyuarteqlua yuum unguvaqallra nanilan tuaten ayuqluteng yuullerkaat assinrunayukluku.

⁴Canek angelrianek taqutellruunga. Enenek wine-arkat-llu nauceciirvigkaitnek taqutellruunga pikamnek.

⁵Naucetaarviliunga atsat-llu nauvigkiurluki, ayuqenrilngurnek napanek atsangtulinek pitarluni;

⁶Elaglua-llu nanvarrarilua merqessuutekaitnek.

⁷Kiputellruunga amllernek pisten̄ek pisterlua-llu enemni yuurtellernek. Ungungssiutenka-llu amllenruluteng allani Jerusalem-aami ciungani uitallerni.

⁸Quyurcillruunga-llu qerrirlinek suulutaanek-llu angayuqat tukuutaitnek nunanek ataniumakemnek. Angutet arnat-llu atualuteng avayurtelaraatnga, arnanek-llu nuryugcivkenii.

⁹Tua-i angelriarurtellruunga, anaggluki yuut ciumni uitallret Jerusalem-aami; umyuartulqa-llu cakaniqsaunani.

¹⁰Cat tamalkuita ayarikellrenka, piksagutelaranka. Anglaniqallerkaqa narurcuitaqa. Ukveraitua caliallemnek, makut-llu maa-i wangnun nunuliutnguluteng.

¹¹Tua-llu umyuangcautekanka caliaqellrenka cakviuraqlua-llu pilalqa, maaten piunga camek kangiinani. Ayuqluni tau͡gaam anuqmek malirqeralriatun—cam makugutkellra nunami maani cauvkenani.

¹²Tua-i-wa, angayuqaq ciumini angayuqaullrem tau͡gaam caliallrinek caliciqliniuq. Taumek umyuangcautekaqa qaillun ayuqucia murilkenricaram, umyuartullrem, usviilkarcaram-llu.

¹³Ilumun, nallunritaqa, “Umyuartuneq assinruuq usviilkarcarami, tanqiim assinruciatun tan'germi.

¹⁴Umyuartulriim tangvalaraa ciuneni, usviilnguut tau͡gken tuaten piyuunateng.” Tau͡gaam cali nallunritaqa tamamta ciunerkamta ayuqluta utaqacia.

¹⁵Waten umyuartequa, “Umyuarkilngurnun tut'ellret wangnun-llu tuciiqut. Tua-llu camek unangellrusia umyuarturillermek?” Wangnek-llu kiugua, “Camek carraungraan pillrunritua.”

¹⁶Kia neq'aksuitai umyuartulriit, kia-llu neq'aksuitai umyuarkilnguut. Ernerni tekitarkani wangkuta-llu nalluyagucimaciqukut. Tamamta tuquarkaungamta—umyuartulriit umyuarkilnguut-llu ayuqluteng.

¹⁷Taumek unguva wangni caunrilngurtun ayuqlirillrulria, tua-i-wa cam tamarmi pillrem arenqiallugutmun tekiutellruanga. Tamarmi cauvkenani; anuqmek malirqeralriatun ayuqellrulua.

¹⁸Calilua unakellrenka wangnun caunrilngurtun ayuqut, tua-i-wa nallunrilamku kingumkun angayuqaugarkamun unitarkaungamki,

¹⁹umyuartuciqelliuq, wall'u usviiciiqelliuq—kia nallunricartau? Tau͡gken elliin piksaguciiqai tamalkuita makugglua umyuartulqa-llu aturluku unakellrenka maani ellarpagmi. Tamarmi caunripagta.

²⁰Taumek qessanayungelalrianga makugcimallemnek.

²¹Ca caliaqelaran umyuartucin, elisngacin, munallren-llu tamalkuan aturluku, tua-i-llu unilluki tamakut unakelten caliaqestekenritellratnun. Caunrituq tamana, atawauvkenani-llu!

²²Unguva aturan caliluten umyuarrlugcarluten, tua-llu camek nasvagarkangqercit tamatum atullranek?

²³Unguvallerpet taktaciatun, callren tamarmi unangkengangqertuq umyuarrlugcarautmek umyuam-llu navguumallranek. Unugtuumaan umyuan mernuinerciutaunani. Tamarmi cauvkenani.

²⁴Callemten̄i assinqurrauluku aturarkaugarput nerrlerput cali mell'erput cali-llu angniutekellrat unangkengamta. Tau͡gken, taringua Agayutmek-llu makut kingunengqellinilriit.

²⁵Nau͡gg'un allakun camek neqkangqerciqsit wall'u angniutekangqerciqsit?

²⁶Agayun cikiqenglartuq umyuartunermek, elisngamek, angnimek-llu maligtaqustem̄inun, tau͡gken assiilngiumalriit calivkaraqluki akingevkarluki, akinek-llu qemangqaangevkarluki, unakellrit cikiuteknaluki maligtaqustem̄inun. Tamarmi-llu man'a caunrituq. Anuqmek malirqeralriatun ayuquq.