Read Yupik Ecclesiastes 3 Bible Online

Ecclesiastes 3 - Yupik bible

Ecclesiastes 3

¹Cat tamarmeng piuralriit maani ellarpagmi pilartut Agayutem pillerkiuraani.

²Yuurtellerkartangqertuq tuqullerkartarluni-llu; nauceciillerkartangqertuq quyurcillerkartarluni-llu,

³tuqucillerkartangqertuq canrircecillerkartarluni-llu, imcillerkartangqertuq naucillerkartarluni-llu.

⁴Angniitellerkartangqertuq angnillerkartarluni-llu, tuqulrianun qiallerkartangqertuq yurallerkartarluni-llu,

⁵kenkuurutlerkartangqertuq kenkuurutlerkartaunani-llu, cingautellerkartangqertuq, cingautenritlerkartarluni-llu.

⁶Elkarcilartuq nalaqutlerkamek tamarillerkamek-llu, aninqillerkartangqertuq, ciqicillerkartarluni-llu,

⁷allgurillerkartangqertuq mingqellerkartarluni-llu, nepaitellerkartangqertuq qanllerkartarluni-llu.

⁸Elkarcilartuq kenkutlerkamek eq'ukutellerkamek-llu, anguyallerkamek uitanqegcillerkamek-llu.

⁹Camek unangelarceta calimallemten̄ek?

¹⁰Nallunritanka uqamailnguut atmiit Agayutem wangkutnun ellillri.

¹¹Cat tamalkuita elliin elluarrluki pillerkiullrui. Paqnayugyaramek-llu cikillruakut ciunerkaq nallunricugtelluku, tau͡gaam paqnanaircecuunaku umyuarput engelkarrluku taringenqegcaartelluku elliin caliani.

¹²Taumek wiinga taringaqa camek allamek pikartailucia avatiini angnillerkamta unguvallemta-llu taktaciatun assilriamek calillerkarput.

¹³Tamamta nernarqaakut merluta-llu, angniutekluki-llu caliluta unakek'ngalput. Tamana Agayutem cikiutekaa.

¹⁴Nallunritaqa Agayutem pillra tamarmi piugarkauguq akwarpak. Camek ilangaitan ilangarrngaunaku-llu. Tuaten-llu Agayutem ayuqevkaraa yugnun qigcikesqelluni.

¹⁵Ca tamarmi pilleq wall'u piarkaq ak'a pillruuq ciungani. Agayutem cat pinqigtaarcet'larai.

¹⁶Cali-llu ilaluku, tangellruaqa cali ellarpagmi maani atulauciat inerciigalliqsaraq elluaryaramek piciunermek-llu atullerkameng nalliini.

¹⁷Wangnek-llu qanrutua, “Agayutem cuqteqatarai ellualriit assiitellriit-llu ayuqluki, tua-i-wa ca tamarmi, pillerkaq tamarmi, piciquq pillerkani tekiskan.”

¹⁸Umyuaqa atauciurtuq Agayutmun naspaamacimten̄ek, nasvitnaluta ungungssiarni cangallrunrilucimten̄ek.

¹⁹Tua-i-wa, ayuqluki ataucim ciunerkaata utaqai yuut anerteqellriit ungungssit-llu. Ayuqlutek tuquciquk. Ayuqlutek anerteqelriaruuk. Yuk cangallruvkenani ungungssiarmi, unguvallrak-llu camek pitengqerruciinani.

²⁰Tamarmek ataucimek ciunerkarlutek—urr'amek. Tamarmek taumek kingunerlutek; tamarmek tuavet uterciiqlutek.

²¹Kia nallunritau yuum anerneran qulmun ayalaucia ungungssiaraam-llu anerneran nunamun pulalaucia?

²²Taumek taringua callemten̄i assinqurraugarkaucia angniuteklerkai caliluta unakek'ngalput. Tamana yuum tamarmi aturarkaqngaku. Wangkuta-llu qaillun nallunrirciiganaku qaillun ayuqucirkarput tuqukumta.