Read Yupik Ecclesiastes 5 Bible Online

Ecclesiastes 5 - Yupik bible

Ecclesiastes 5

¹Mulngakekina ayallerkarpenek Agayuvigpagmun. Assinruuq ayalleq tuavet camek elitnaluni elliillerkami tuqutarkanek usviilngurtun yugtun nallustiinun assilriim assiitellriim-llu.

²Umyuangcaraqluten qanerpailegpet, umyuangcarraarpek'nak-llu akqut'liksaunak Agayutmun. Qilagmi uitauq elpet-llu nunami uitaluten, taumek amllermek qaneryaqunak.

³Umyuarrlugcaravakarluten, qavangurtuangeciquten assiitellrianek, qanerpakarluten-llu, usviilngurtarmek qanerturainarciquten.

⁴Taumek akqut'likuvet Agayutmun, tamaa akqutkellren pingnaqkiu. Usviilnguut caukenritai. Akqutkellren pikiu.

⁵Akqinritleq assinruuq akqirraarluni atunritlermi.

⁶Qalartellerpenun assiilngurmun tekiucecaqunak, qanrucuaran Agayutem agayulirtii pitsaqluten pillrunritniluten. Ciin Agayutmun eq'uk'ngevkaqatarcit? Ciin elliinun piunrircetqatarciu caliallren?

⁷Qaillun pitalriamek camek tangrruarluten piyugyaaqeng'e'rpet, qaillun amllertalriamek calingerpet caunrilngurmek, wall'u-qaa qaillun pitalriamek qalarteng'e'rpet, cali Agayun qigcikarkaqan.

⁸Alangaaryaqunak nallunriquvgu anguyagtem nangcilaucia arrsaulrianek elluarrluteng-llu cuqcimallerkaat piyunarquciit-llu aturcetevkenaki. Tamarmi atanerruaq cayailkuciumalartuq quyineminek, tamarmek-llu cayailkuciumalutek ellmegni quyinrulriamek.

⁹Quyurciyaraq atanrung'e'rmi neryuniurutkelaraa.

¹⁰Aki kenkekuvgu, umyuan elkarrngaituq; tukuulriaruyukuvet, tamalkuita piyulten unakngaitaten. Man'a cali cauvkenani.

¹¹Tukuurtellren maliggluku, nerqerkaten amlleriinarciqut. Kiingan unangeciquten nallunritellranek tukuucirpet.

¹²Caliuralria yuk neqkaminek enuqit'lang'e'rmi qavaryugluni qavalartuq. Tukuulria tau͡gken caucissiyaagami umyuarrlugca'rluni tukuutminek qavarciigat'lartuq.

¹³Wani-wa-llu una arcaqalria tangelqa maani ellarpagmi: yuut akiuteteng aninqelarait aturyukunegteki aturnaluki,

¹⁴cagmarluki-llu picurlakallermegteggun, iquani-llu irniameggnun paitarkairulluteng.

¹⁵Nuna man'a unitelararput yuurtellrucimcetun—camek piinata. Calimallrungramta camek ang'aqisciiganata.

¹⁶Elluanripagta! Ayalartukut tekitellrucimcetun. Cakviulartukut, anuqa angungnaqluku, camek tua-llu unangelarceta?

¹⁷Unguvaqallerput atularaput tan'germi angniitnami-llu, umyuarrlugca'rluni, qenerrluni, wall'u naulluuluni.

¹⁸Mat'umek nallunrillruunga: callemten̄i assinqurrauguq nerrlerkarput mell'erkarput-llu atuluaqallerkai-llu caliallemta Agayutem cikiutii unguvavut nanilengraan atullemten̄i; man'a ciunerkaqaput.

¹⁹Agayutem cikiqakut tukuutnek aklunek-llu, aturyugngavkarluki-llu angniutekluki, quyaluta aturarkaugaput calillemteggun unakelput. Man'a Agayutmek cikiutnguuq.

²⁰Agayutem-llu angnircecakut, umyuarniurutekngaitarput unguvam nanilucia.