Read Yupik Ecclesiastes 6 Bible Online

Ecclesiastes 6 - Yupik bible

Ecclesiastes 6

¹Murilkellruaqa maani ellarpagmi arcaqalria elluanrilnguq atuumacia.

²Agayutem cikirciqaakut tukuutnek, takarnarqutmek, aklunek-llu, aa-ang, piyullemten̄ek tamalkuitnek, tau͡gaam wangkutnun angniutekluki aturcetevkenaki. Allanrem tau͡gaam aturluki. Man'a caunrituq, ellualriaruvkenani-llu.

³Irniangqerciqsaaqukut yuinarnek tallimanek (100) unguvamaluta-llu, tau͡gaam qaillun taktalriamek unguvangramta, angnirnamek pingenrilkumta elluarrluta-llu qunguucimanrilkumta, wiinga qanertua tuqumarmi mikelnguyagaq yuurtellria assinruuq.

⁴Mikelnguyagaq tauna yuurteng'e'rmi assinrituq, tan'germun tamaami, nalluyagucimallerkaminun.

⁵Erenrem tanqia tangellrunritaa nalluluku-llu qaillun unguvallrem ayuqucia, tau͡gaam mernuinercitkanguq—

⁶anaggluku angun camek angniutailnguq, unguvamayaaqeng'e'rmi tiissitsaagnek malrugnek (2,000) allrakurrluni. Tamarmek-wa tua-i ataucimek ciunerkangqerramek.

⁷Caliaput caliaqelaraput neqkangllerkarput pitekluku, tau͡gaam pitalqeggiyuunateng.

⁸Qaillun yuut umyuartulriit cangallrunritat usviilngurni? Catkeciqau arrsaulriim nallunriquniu qaillun yuungnaqlerkani?

⁹Man'a caunrituq; anuqmek malirqeralriatun ayuquq. Assinruuq cangalliurpek'nani pillerkaq unangkengaminek mayitequrallerkami canek allanek.

¹⁰Cat tamarmeng piuralriit ak'a tamaani pillerkaat taqumallruuq, tamamta-llu nalluvkenaku elpet qanemyuugaucisciigalucin elpeni pininrulriamek.

¹¹Kiutaariinallren maliggluku, caunririinarciquq, elpenun-llu assirikaniutnguvkenani.

¹²Kia nallunriciiqau ca assirarkaucia wangkutnun mat'umi naninani, atuunrilngurmi unguvamten̄i—unguvami kitulriami talinertun? Qaillun nallunriciiqseta ca caarkaq maani nunami tuqullemta kinguani?