Read Yupik Ecclesiastes 7 Bible Online

Ecclesiastes 7 - Yupik bible

Ecclesiastes 7

¹Yuum niitekegcinarqellra assinruuq akitulriami tepkegcautmi; erneq-llu tuqullren assinruluni ernermi yuurtellerpeni.

²Assinruuq enemun itleq yuarnayulrianek yul'egmun itlerkami enemun akusrartellrianek yul'egmun, tua-i-wa yuum umyuaqelararkaungaku tuquarkaucirput tamamta.

³Angniitelleq assinruuq engelallagallermi; angniitellren kegginarpegun nallunaiciiqsaaquq, tau͡gaam angniitellerpegun cat taringekanilaraten.

⁴Kina imna angnillerkaminek umyuangcarturalria usviituq. Umyuartulriim tuqullerkani umyuaqelaraa.

⁵Assinruciquq umyuartulriim yuum nunuqaten usviilngurnek yugnek nanraumallerkarpeni.

⁶Usviilnguum engelallagallra ayuqelartuq cukilanatun ekuallagalriatun cingqullagaluni kenermi. Camek picingqerpek'nani.

⁷Umyuartuyaaqeciquten, tau͡gaam kina iqluurluku teglegikuvgu, usviilnguum ayuquciatun piuten. Akimek akurtuquvet atawaunrilngurkun, pillni akingutekluku, yuucin caunrirciqan.

⁸Cam iquklitellra assinruuq ayagnillermini. Nerinisngialliqsuitelleq assinruuq ellminek pivaknermi.

⁹Qenerteng'e'rpet nayumiqakiu: usviilnguut tau͡gaam pagglungqelartut.

¹⁰Waten apteksaunak, “Ciin tua-i au͡gna kingunerput assinrullrua mat'um nalliini ernerni?” Umyuartulriim una apyutkaqenritaa.

¹¹Tamarmeng yuulriit umyuartunaqsaaqai; cangallrunrilan paitarkaminek akurtulriami

¹²tua-i-wa umyuartuyaraq cayailkutngulria ayuqluni akitun aulukutngulriatun. Elisngayaram pinia waniwauguq—umyuartullmikun yuum unguvani piku'urciqaa.

¹³Umyuaqiciki Agayutem caliari. Yuum-qaa nakercugngaa Agayutem pertellra?

¹⁴Cat assirluteng piurqata quyakina, picurlagnarqellriim-llu tekiskaten una umyuaqekiu: Agayutem angnirnarqelria picurlagnarqelria-llu taivkalarak; elpet-llu nalluluku cam piqataucia waniku.

¹⁵Wiinga unguvalqa catngullrunrituq, tau͡gaam unguvallemni cat tamalkuita tangellruanka. Yuut ilait ellualriit tuqulartut allat tau͡gken unguvamaluteng, assiilngurmek caliangqeng'e'rmeng.

¹⁶Taumek umyuartungnaqsiyaagyaqunak wall'u ellualriarungnaqsiyaagyaqunak—ciin elpenek tuquciiqsit.

¹⁷Tau͡gaam umyuarrliqsiiyaagyaqunak wall'u usviilkartessiyaagyaqunak-llu, ciin pinarivailegpet tuqullerkan tekicugciu?

¹⁸Avisgu pivallagallerkan ukugnun. Qigcikikuvet Agayutmek, piluaqerturciquten tau͡gaam.

¹⁹Umyuartuyaram yuk umyuartulria pininruvkalaraa qulni atanirturilriani nunarpagmek.

²⁰Yugtaituq nunam qaingani ellualriamek aturrlainalriamek alarteqayuilngurmek-llu.

²¹Niicugniksaunaki tamalkuita yuut qanellrit—niicuaran pisten qanerrlulria elpenek,

²²nallunrituten-llu elpenek pulengtarmek allat yuut qanerrluutek'laucirpenek.

²³Umyuartulqa aturluku naspaallruaqa man'a tamalkuan. Cumigtellruyaaqua umyuartuyuglua, tau͡gaam tamana wangnek yaaqsilliniuq.

²⁴Qaillun kia imum nallunrirciqau unguvam caucia? Et'ulriatun wangkutnun ayuquq, taringellerkaa caperrnarqellriaruuq.

²⁵Tau͡gaam wiinga pingnatuutekellruaqa elisngayaraq elitengnaqsaraq-llu; Cumigglua nalaqsuumillruaqa umyuartuneq apyutma-llu kiutait, nallunriryugluku-llu assiilucia caunrilucia-llu usviicaram.

²⁶Nataqutellruunga tuqum neqniallranek—arnamek kapkaanatun ayuqellriamek. Kenkem manamaartuutiin elpenun cangtaqciqaaten kuvyatun, talligken-llu qesngastegpet tegumiaqeciqaagten kalivnertun. Angun Agayutem umyugaanek nall'arcilria anagciquq, tau͡gaam assiilngiumalria cangtaqciqaa.

²⁷Aa-ang, qanertuq Qaneryariurta, man'a nallunrillruaqa carrauqaqluku yuallemni cat kiutaitnek.

²⁸Allanek kiutnek yuallruyaaqua tau͡gaam nalaqutellrunritua. Yuallemni nalaqutellruunga tiissitsaani (1,000) ataucimek angutmek qigcikarkamnek, tau͡gaam arnamek pivkenii.

²⁹Wani-wa kiingan elitelqa: Agayutem piliaqellruakut ayuqucirramcetun, tau͡gaam wangkutnek qacignairutellruukut.