Read Yupik Ecclesiastes 8 Bible Online

Ecclesiastes 8 - Yupik bible

Ecclesiastes 8

¹Umyuartulriim tau͡gaam cam caucia taringumapialaraa. Umyuartunrem-llu qavyurtenrirtelluku quuyurnivkalarai.

²Qanellra angayuqam aturciu, umyuangcarraarpek'naci-llu akqiksaunaci Agayutmun.

³Angayuqaq piyullermitun piyugngauq, taumek ciuqerranek ayagci; uitanrici aarnaqpialriami.

⁴Angayuqaq piunarquciliumacimitun pilartuq, kia-llu imum inglulirciiganaku caliara.

⁵Niisngakuvki alerquutai, cam pingaitaaten, umyuartulriim-llu nallunrit'laraa qaillun nani-llu elluarrluni pillerkani.

⁶Elluarrluni cat pillerkaatnek pitangqertuq, cali-llu elluarrluni cat caliaqumallerkaatnek pitarluni, wangkuta tau͡gaam carraq kiingan nallunrit'lararput.

⁷Tamamta nallulararput cam piqatallra, kitumek-llu qanrutestekaunata.

⁸Kia unguvani tegumiaqenritaa wall'u tuqullerkaminek yaaqvaqanirisciiganani. Anagciigatarput qaillukuangramta tuaten pillerkarput.

⁹Tangrraqa man'a tamalkuan umyuangcallemni yuut pillritnek maani nunami, ellarpagmi maani yuut ilait pinilriaruluteng nangcilriarulartut ellmeggni cakegtaunrillrulrianek.

¹⁰Aa-ang, tanglartua-llu assiitellrianek yugnek tungmagcimalrianek qungumeggni uitaluteng, tau͡gken tungmagtestellrita utertaqameng nanrarluki nunarpagni assiilngurmek aturvikellratni. Tamana caunrituq.

¹¹Ciin yuum inerquun navegyukaaralartau? Tua-i-wa picurlaun egmianun anucimirqecetaarumaksaitelaami.

¹²Assiilngiumalria yuinaat talliman (100) tekilluki inerquutnek navgillrung'e'rmi unguvauralartuq. Niitelaranka qanraqata: “Agayun niisngakuvgu, cat tamarmeng assirluteng piurciqut,

¹³assirluteng tau͡gaam pingaitut yuut assiitellriit. Unguviit talinertun ayuquq, tuquciqut ayagyuarluteng, Agayun niisnganrilamegteggu.”

¹⁴Man'a tau͡gaam ellmikuuguq. Tangvagciki nunami piuralriit: iliini assinge'rmeng yuut assiilnguut anucimirqecetaarutkaat atularaat, assiitellriit-llu yuut assilriit nunuliutekaatnek akurturaqluteng. Qanertua man'a caunrituq.

¹⁵Taumek ukvertua nunaniryugluta yuuyunarqucirput, tua-i-wa kiingan nunaniryuutek'laamteggu nerrlerkarput, mell'erkarput, wall'u angnirluta pillerput. Waten pinarqaakut cakviurluta yuungnaqurallemten̄i, unguvamek Agayutem cikiumallrani maani ellarpagmi.

¹⁶Umyuarturingnaqaqama nallunringnaqluki-llu cat piuralriit maani ellarpagmi, nallunrirtua kina qavayuunani unugmi wall'u erenrani umyuartequmayaaqsalliniuq,

¹⁷tau͡gaam taringengaitellinia Agayutem caliara. Caknerpak pingnatunge'rpet, ayuqucingengaitan. Umyuartulriit qanerciqsaaqut nallunritniluku, tau͡gaam tuaten pinritut.