Read Yupik Ecclesiastes 9 Bible Online

Ecclesiastes 9 - Yupik bible

Ecclesiastes 9

¹Man'a ak'anun umyuangcautekellruaqa, nallunrirluku-llu Agayutem tegumiaqellinia yuum ellualriim umyuartulriim-llu qaillun eglertellerkaa, wall'u kenkillerkaa eq'urtellerkaa-llu. Kia nallua ca ciunemini tekitarkaq.

²Yuk ayuqluni ataucimek ciunerkarluni. Atauciuluni ciunerkaat tamarmeng ellualriit arcaqalriamek-llu assiilnguliulriit, assilrianun assiilngurnun-llu, menuilngurnun menuulrianun-llu, tuqutarkanek elliitulinun elliiyuilngurnun-llu. Assirluni yuulria assilriakun pinrungaunani assiilngiumalriami. Yuk-llu ukvernarcarilria elluanruvkenani tuaten pinrilngurmi.

³Ataucim ciunerkamta tamamta tekitelaraakut ayuqluta, man'a-llu alangqalriaruuq maliggluki mat'umi ellarpagmi piurtellriit. Yuum umyugaa unguvaqallmi taktaciatun assiitellriamek eq'urrutmek-llu imangqelartuq, tua-i-llu alqunarmek tuquluteng.

⁴Tau͡gaam kina imna yuk anerteqelria neryuniurutengqelartuq; assinruuq qimugta anerteqluni yugtutulimi tuqumalriami.

⁵Ilumun kia anerteqelriim tuquarkaucini nallunritaa, tau͡gken tuqumalria camek nalluluni. Camek allamek nunuliutekaituq, kia-llu umyuaqngaunaku.

⁶Kenkillrat, eq'ukillrat, aglumalallrat, tamarmeng tapqulluteng tuqullruut. Ilaunqiggngaunateng canun piuralrianun maani ellarpagmi.

⁷Kitaki neqten neriki angnirluten-llu; merr'u wine-auten nunaniryugluten-llu. Tua-i-wa Agayutem ak'a tuaten pillerkiullruaten.

⁸Tangellren angnirturcet'laqiu nunaniryugluku-llu.

⁹Angnirluten unguvaurqina kenkek'ngan pillgucirluku, unguvakiuten caunrilnguq Agayutmek atullerpeni maani nunami. Angnirluten erenret tamalkuita aturluki, tua-i-wa tamana kiingan unangkengaqeciqngavgu arenqiallugtaallerpenek.

¹⁰Calirpagluten calikina caliarpeni caungraan, tua-i-wa tuqumalriit nuniitni calriartailan, umyuarteqelriartailan, elisngayarartaunani, umyuartuyarartaunani, tuavet-llu elpet ayagarkauluten.

¹¹Allamek cali taringellruunga, maani nunami uqilalriit kiimeng anagkengerrlainayuitelliniut, cacetulriit-llu anguyallermeggni anagturayuunateng. Umyuartulriit kiimeng unangurayuitut yuutekameggnek, elisngalriit-llu kiimeng tukuurcuunateng, caliyugngalriit-llu yuut elluarrluteng kiimeng quyilrianek caliangyuunateng. Arenqiallugutem yuk tamalkuan tut'elaraa.

¹²Nallunritesciigatan qaku tuqullerkan. Ayuqngamta yaqulegtun alqunarmek naptellriatun, neqtun-llu kuvyamun naptellriatun, wangkuta naptelartukut assiitellriim tut'aqakut neryuniunritlemten̄i.

¹³Allamek cali tangellruunga, assilriamek cuqyutmek qaillun umyuartuyaram umyuartequsngallranek maani ellarpagmi.

¹⁴Nunarrartangqellruuq yugyanrilngurmek. Pinilriim angayuqam curugaa. Kassugutaa upluni-llu qacarneri navgurluki iternaluni.

¹⁵Yugtangqellruuq taukumiumek arrsaagauluni, tau͡gaam umyuartupiarami anaucugngallruyaaqaa tauna nunarraq. Tau͡gaam kia iliita umyuaqenritaa tauna.

¹⁶Wiinga aguagtelartua umyuartuneq assinruniluku pinimi, tau͡gaam yuut umyuarteqsuitut arrsaulriit umyuartuyukluki qanellri-llu murilkessuunaki.

¹⁷Assinruuq niicugniuralleq umyuartulriim qalarqurallranek, niicugnillermi qayagpagallranek usviilnguut atanirturtiita.

¹⁸Umyuartuneq assinrulriamek calilartuq caskulluarqellermi, tau͡gaam assiitellriim yuum assiirucugngaa assiryaaqelleq.