Read Yupik Song of Songs 1 Bible Online

Song of Songs 1 - Yupik bible

Song of Songs 1

¹Niitnirqenqukacagait yuarutet, Solomon-aam yuaruciallri.

²Kenken wangnun nasvagan; kenken assinruuq wine-ami.

³Avaten tepkeggninarquq; qanrutkellran aterpet neq'ercet'laraa. Taumek neviarcat kenkekiitgen.

⁴Malikia, ayagniartukuk. Angayuqam taitellruanga qavarviminun. Angnirciqukuk aipaqlunuk; Kenken nalugciqapuk wine-ami pinruluku; elluatun kenkaatgen.

⁵Tungungaunga, tau͡gaam kenegnarlua, Jerusalem-aam paniini, Kedar-aam pelatekaitun, 'lumarratun capaitun Solomon-aam eniin.

⁶Tangvanricia caunrilleklua tungulqa pitekluku, tua-i-wa akertem palirtellruanga. Anngarma qenngutellruatnga wine-arkat-llu naucetaarviatnun nayurteksagutellua; Tau͡gken, wiinga nakmiin wine-arkanek naucetaarvika caliaqellruvkenaku.

⁷Qanrusnga, yuucima kenkek'ngaan, nani katngaten nerevkalarciki, nani mernuinercircet'larciki erenrem qukallrani; Ciin wavirtaalriatun piyarcia allat qusngiliurtet katngaita akuliitni?

⁸Nalluan-qaa nanlucia, arnat kenegnanqukacagiitni, maligeski tumait katngiit, qusngirngalnguuteten-llu nerrlerkaatnun arulairulluki qusngiliurtet pelatekaita caniatnun.

⁹Ayuqestassiigut'laramken, kenkekmaa, Pharaoh-m ayagassuutain arnacaluatnun.

¹⁰Kegginan kenegnartuq tangnircaumaluni uyamiten-llu teggalquqegtaaraat.

¹¹Tangnircauteliciqamegten suulutaamek, qerrirlimek tangnircautelegmek.

¹²Angayuqaq inglemini taklallruuq, tepkegcautma-llu man'a narniriluku.

¹³Kenkek'ngaqa wangnun ayuquq myrrh-atun manumni uitalriatun.

¹⁴Kenkek'ngaqa wangnun ayuquq naugimalriatun quyungqaluteng henna-tun wine-arkanek naucetaarviini Engedi-m.

¹⁵Atam, kenegnaqpiartuten, kenkekmaa; atam, kenegnaqpiartuten; kenekmek iigken ciqinqalarpagtak!

¹⁶Atam, kenegnaqpiartuten, kenkekmaa, ilumun kenegnaqpiartuten; angnircet'lararpenga! Can'get cungagcetellriit inarvikciqapuk;

¹⁷enemegnuk qanai cedar-aaruut, cypress-aat-llu enem qulekluki.