Read Yupik Song of Songs 4 Bible Online

Song of Songs 4 - Yupik bible

Song of Songs 4

¹Cakneq kenegnaqpiartuten, kenkekmaa, tangerrluku, kenegnapiartuten! Iigken ciqinqerlutek kenekmek kegginarpet capiin amatiini. Nuyaten ayuqut katngagtun qusngirngalngurtun, atralriatun uvernerikun Gilead-aam.

²Kegguteten ayuqut qatellriatun qusngitun asmegcimanerralriatun eruumanrralriatun. Qaqimaluteng; elucqeggluteng.

³Qerrlugken ayuquq kavirlitun 'lintarkatun, qanren-llu kenegnarquq. Ulluviigken pomegranate-am avgegcetun ayuquk, kegginarpet capiin amatiini.

⁴Uyaqun ayuquq David-aam enengutiitun qertulriatun, piliarullertun anguyagcuucet ellivigkaqluku, tuani agaut tiissitsaat (1,000) tegumiaqsarat capkutat, tamarmeng anguyagcet capkutaqluki.

⁵Evsaigken ayuquq qazelle-agcetun, malrigtun tuntuyaagaagtun, gazelle-am malrigketun, nerlalriigtun lily-t akuliitni.

⁶Errvianun talinret-llu catairulluteng, cukangnaqlua ayagciqua myrrh-am ingrianun penguanun-llu frankincense-aam.

⁷Natlugnerituten, kenekmaa; canganarquralriartaituq elpeni.

⁸Maligesnga Lebanon-aam Ingriinek, nulirkautmaa; maligglua ayii Lebanon-aamek, nulirkautmaa; maligglua ayii Lebanon-aamek. Atraa Mount Amana-m kangranek, ingrianek Senir-aam Hermon-aam-llu, yugtutulit igtaitnek, leopard-aat-llu ingriitnek.

⁹Iigpet, kenkekmaa, nulirkautmaa-llu, atuqengarpet-llu uyamigpet ircaquqa agtullruak.

¹⁰Kenekvet angnircet'laraanga, kenkekmaa, nulirkautmaa. Kenken assinrurpagtuq wine-ami; tepkegcauten-llu narnirqenruluni spice-ani.

¹¹Honey-tun qerrlugken ayuquk, kenkekmaa; alunguten milguuq honey-uluni-llu wangnun. Aturavet tepiit Lebanon-aam tepiitun ayuquq.

¹²Kenkek'ngaqa, nulirkauteka, naucetaarviuguq nallunriumanrilnguq, naucetaarvik qacarnelek, ulevlaq allat yuut nallukiit.

¹³Tuani naucetaat naurpalartut. Naulartut napatun naucetaarviicetun pomegranate-at naugiaqluteng-llu assinqukacaarnek atsanek. Tuani henna nard-aq-llu nurnaitut,

¹⁴saffron-aamek calamus, cinnamon-aamek-llu, wall'u ayuqenrilngurnek frankincense. Myrrh, aloes-aaq-llu naulartuk tuani ilakluki narninqurrak'acagait tepkegcautet.

¹⁵Naucetaarviim ulvelriara, elakaq unguvanarqelriamek mermek imalek, carvanilriit-llu kuiggaaraat Lebanon-aamek.

¹⁶Tupii, Negeqvam Anuqiin, tailuten-llu Ungalam Anuqiin! Cupiu naucetaarvika; tepii ayagavkarluku yaaqvanun. Kenkesteka taivkarluku naucetaarvianun nerniartuq assinqurraitnek naunrain.