Read Yupik Song of Songs 5 Bible Online

Song of Songs 5 - Yupik bible

Song of Songs 5

¹Taigua naucetaarvimnun, nulirkautmaa. Avuranka myrhh-autenka spice-autenka-llu, nerua honey-utemnek; mertua wine-autemnek milgutemnek-llu. Nerici, yugnikumalriani, merluci-llu; merluci-llu, elpeci kenkilriani!

²Qavallruunga, tau͡gaam ircaquqa tupaumallruuq. Kaaka! Kenkek'ngaqa tukriartuq. “Ikirusnga, kenkekmaa, yaquliyagamaa, camek canganarqutailngurmi; qamiquqa mecungan yukutamek, nuyanka-llu yukutarrluteng unuum kucirtullrinek.”

³Ak'a aturanka yuullruanka; ciin cali aturanka ac'arcia? It'ganka erullruanka; ciin iqaurcarcia cali?

⁴Kenkek'ngama tegua amiigem teguyaraa, ircaquqa-llu angnillruuq.

⁵Nangertellruunga ikirutnaluku kenkek'ngaqa. Unatenka minguumaut myrrh-amek, yuaranka-llu mermek myrrh-amek, tegullemni amiigem teguyaraa.

⁶Ikirutaqa kenkek'ngaqa, tau͡gaam kenkek'ngaqa tuiggluni ayallrulliniuq. Niiteqeryuumiryaaqellruaqa erinii! Kiarcaaqaqa, tau͡gaam nataqevkenaku; Qayagauryaaqaqa, tau͡gaam kiullrunrituq.

⁷Nayurtet nataqellruatnga, tarritaallermeggni nunarpagmi; nangtellruatnga, kilillruatnga, ulikutaqa-llu tegullruat, taukut qacarnerem nayurtain.

⁸Kaigavikamci, Jerusalem-aam paniini, nataqekuvciu kenkek'ngaqa, qanrutesqelluku aglumacimun piniarutnilua.

⁹Cangallrua kenkek'ngan allami kenkek'ngami, elpet arnat assinqukacagiitni? Cangallrua kenkek'ngan allami kenkek'ngami, tuaten wangkutnun kaiganaqluten?

¹⁰Kenkesteka kenegnartuq pinirluni-llu; alaiterpagluni qulni tiissitsaat akuliitni.

¹¹Qamiqurra assinqukacagauguq suulutaaq; nuyai qiivluteng, tunguluteng tulukarugtun.

¹²Iik kenegnaqpiartuk yaquliyagartun kuiggaaraam carvelriim canianelngurtun, eruumalriatun milegmi taqenqeggluni.

¹³Kegginaa kenegnartuq spice-at naumauviacetun, tepkegcilriatun. Qerrluk lily-tun ayuquk, mecunglutek myrhh-amek urcimalriamek.

¹⁴Unatai taqenqegtuk, kulutertulartuq teggalquqegtaarnek ellivikumalrianek. Temii tulutun manigcetellriatun ayuquq, sapphire-anek ellivikumalriatun.

¹⁵Iruk alabaster-aatun ayuquq suulutaamek ellivilegtun. Tangellra ayuquq Lebanon-aatun, assirtaluni cedar-aacetun.

¹⁶Qanellra niitniqpiartuq, ellii-llu tamarmi piksuuminarquq. Waniwauguq kenkek'ngaqa waniwauluni-llu yugnikek'ngaqa, Jerusalem-aam paniini.