Read Yupik Song of Songs 6 Bible Online

Song of Songs 6 - Yupik bible

Song of Songs 6

¹Natmun ayallrua kenkek'ngan, arnat assinqukacagiitni, Nacetmun ayallrua kenkek'ngan, yuarniarput ikayurluten?

²Kenkesteka atrallruuq naucetaarviminun, spice-at naumaviatnun, nerevkarnaluki katngani naucetaarvigni, lily-nek-llu auvurnaluni.

³Kenkestem̄a pikaanga kenkek'ngaqa-llu wii pikaqa; katngani nerevkalarai lily-t akuliitni.

⁴Kenegnaqpiartuten Tirzah-tun, kenkekmaa, kenegnarluten Jerusalem-aatun, alingnaqluten anguyagcetun pelalegtun.

⁵Tuigeskek iigken wangnek, arenqiayugcecagnga. Nuyaten ayuqut katngaicetun qusngirngalnguut, atralriacetun Gilead-aam uvernirikun.

⁶Kegguteten qatertaut katngaicetun qusngit eruumanrrararalriatun. Iliit cataitevkenani; elucqeggluteng.

⁷Kegginan ayuquq avgumalriatun pomegranate-atun kegginarpet capiin amatiini.

⁸Yuinarnek pingayunek (60) angayuqam nulirritnek pitangqertuq, yuinarnek-llu cetamanek (80) arnauterluni, neviarcanek-llu naaquciilngurnek.

⁹Atauciq tau͡gaam kenkaqa, ellii-llu kenegnartuq yaquliyagartun. Aaniin kenkaa, canganarqutaituq antestellerminun. Arnat tamarmeng tangerrluku nanralaraat; angayuqat nulirrita arnautaita-llu nanralaraat.

¹⁰“Kituuga una tangerqallra erqaaralriatun ayuqluni, assirluni iralutun, tanqigpagluni-llu akertetun alingnaqluni anguyagcetun pelalegtun?”

¹¹Atrallruunga napat almond-aat akuliitnun tangerrsarturluki naugaaraat kuignayugmi, tangerrnaluki wine-arkat naugaarauciat, pomegranate-at-llu naugiciit.

¹²Murilkevailegma, tangrruallma aqumtaanga ayagassuutmun angayuqama canianun.

¹³Uterten, uterten, Shulammite-aaq, uterten, uterten, tangvagniamteggen. Ciin Shulammite-aq tangvagyarceciu, yuralriamek tangvalriatun anguyagtet malruin ciuqerratni?