Read Yupik Song of Songs 7 Bible Online

Song of Songs 7 - Yupik bible

Song of Songs 7

¹Tangniqvagtat it'gaten aluilitagni, angayuqam nulirratun ayuqellriami. Irugken pilinguayulim piliaratun ayuquq.

²Qantaq tuantuq, imairucuilnguq avumalriamek wine-amek. Mukaarkat qillengqalriit tuantut, lily-t avatairumaluku.

³Evsaigken tuntuyagaagtun malrigtun ayuquq, qazelle-am malrigcetun.

⁴Uyaquten ayuqut enetun tulutun qertulriatun. Iigken ayuquq nanvarraaraagtun Heshbon-aam nunarpiinelngurtun, taum nunarpiim ikirtuqain canianelnguugtun. Qengan kenegnartuq enengutiitun qertulriatun Lebanon-aam nayurten͞gulalria tauna Damascus-aami.

⁵Qamiqun ciugngauq Ingritun Carmel-aatun. Nuyaten taquumalriit ayuqut 'lumarraqegtaartun; kenegnarqellran angayuqaq irr'ivkaryugngaa.

⁶Kenegnaqvagcit; angniutekellra kenkutvet qaqimavagta.

⁷Pillaganrituten palm-at napacetun, qat'gaten ayuqut quyungqalriatun dates-aatun.

⁸Mayurciqua palm-at napaatnun atsai-llu teguluki. Qat'gaten wangni ayuqut grapes-aatun quyungqalriatun, aneryaallren tepengqertuq apples-aacetun,

⁹qanren-llu assinqukacagiicetun wine-at. Kitak wine-aq qurrlurli kenkestemnun, qerrlugkenun keggutainun-llu.

¹⁰Kenkestem̄a pikaanga, elliin-llu aglumakaanga.

¹¹Taitai, kenkekmaa, ayagnaurtukuk yuilqumun nunarrarni-llu uitaniartukuk

¹²ayagyara'arnaurtukut wine-arkat naucetaarviatnun, tangerrsarturluki wine-arkat naugaarauciit, pomegranate-at-llu napait naugiciit. Tuani cikirciqamken kenekmek.

¹³Mandrake-at tepait narnirqut, tamarmeng-llu assilriit atsat amiimegnuk quliintut nutarat ak'allaat-llu, ellillemnek nutaranek ak'allarnek-llu, kenkekmaa.