Read Yupik Song of Songs 8 Bible Online

Song of Songs 8 - Yupik bible

Song of Songs 8

¹Anngaqlaken-tuq, aanama mugtellratun! Nall'areskumken tumyarani, cingaryaramken kia-llu cangakngaunii.

²Ciuliqagcaramken agulluten-llu aanama eniinun, qavarvianun qingaqestellma. Cikiryaramken tepkegninarqellrianek avulegmek wine-amek merkarpenek, pomegranate-autma egneratnek.

³Unatai-tuq iqsulirnerit qamiquma acianllit, tallirpilirneran-llu tegumiaqlua!

⁴Kaigavikamci, Jerusalem-aam paniin, tupagcesqevkenaku kenka tupagyungvailgan.

⁵Kina man'a taiga yuilqumek, kenkesten̄i tulungqavikluku? Apple-aat napaata aciani tupagtamken. Tuani aanan nep'ngutellrua elpenek, tuani irnillruuq elpenek cakviurluni.

⁶Allanun kenkevkaryaqunak wangnun tau͡gaam; kina tegumiaqsaqunaku talligpeni wii tau͡gaam; tua-i-wa kenka pinian tuqutun, ciknayaraq naklegtaituq tuqutun, tanqiktaallri tanqiktaalqai kenrem, tukniqapigtellriim kenrem.

⁷Mer'ugaat nipngaitaat kenka, ulerpiim-llu qecuqicessngaunaku. Angutem navrucukaki tamalkuita enemi aklui kenekmun, caunrilkumaarkauguq cakneq.

⁸Nayagacuarangqertukut, temii-llu taqmigteksaituq. Qaillun piciqseta nayagarput, erenret iliitni nulirniaqatgu?

⁹Qacarnerukan, qerrirlimek eneliyararput qertulriamek; tau͡gaam amiigukan, capsararput tuskanek cedar-aanek.

¹⁰Qacarnerullruunga, qatganka-llu ayuqellruuk enetun qertulriigtun; tua-llu elliin tangellruanga uitanqegcitmek taitellriatun.

¹¹Solomon-aaq wine-arkanek naucetaarvingqellruuq Baal Hamon-aami; wine-arkanek naucetaarvini navriutekellrua akilirluku nauceciiyurten̄un; atauciuqaqluteng akilirarkauluteng tiissitsaanek qerrirlinek.

¹²Wine-anek naucetaarvika, wii nakmiin pika, wii pikaqaqa; elpet, Solomon-aaq, pinglartuten tiissitsaanek, nauceciiyurtet-llu yuinarnek qulnek (200). Wiinga naucetaarvingqertua nakmiin pimnek!

¹³Elpeci uitalriani naucetaarvigmi, maliinka niicugniut erinavnek; niicetqerru wangnun.

¹⁴Taitai cukangnaqluten, kenkekmaa, gazelle-atun ayuqluten, wall'u ayagyuatun angucalutun tuntutun spice-at ingriata qaingani.