Read Yupik Isaiah 10 Bible Online

Isaiah 10 - Yupik bible

Isaiah 10

¹Aarnarqelriamek ciunerkangqertuci! Alerquutnek taqutelartuci elluanrilngurnek nangetnaluki yuunka.

²Tuaten piluci arrsaulriit piyunarquciitevkalaraci elluarrluki-llu aulukumavkaqsaitaci. Tuaten-llu cali uayaaraqluki aipainret elliraat-llu.

³Qaillun piciqseci Agayutem anucimirqecetaaqaci? Qaillun piciqseci pillugnarqelria taivkaqaku nunanek yaaqsilrianek? Natmun qimagciqseci ikayurtekangengnaqluci? Natmun-llu iirciqseciki tukuuceci?

⁴Anguyagmi tuqucimaciquci wall'u qamurluci ayaucimaciquci teguarurrluci. Tau͡gken cali ATANREM eq'uqertii iquklisngaituq; unatni cali yagingaciqai anucimirqecetaariarkauluni.

⁵ATANEQ qanertuq, “Assyria! Assyria atullruaqa kaugtuutartun anucimirqecetaarluki qenruskenka.

⁶Ayagcetaqa Assyria agayutailngurmun atanruvigmun, yugnun qenngevkartellemnun. Ayagcetellruanka tegulautesqelluki tegliurluki-llu tutmautesqelluki-llu yuut marayatun nunami.”

⁷Tau͡gaam Assyria-m angayuqra umyuamikun picirkiurangqertuq mulngakarkauvkenani. Umyuangqertuq piunrirnaluki amlleret atanruviit.

⁸Ellii ucuryagtuq, “Tamarmeng anguyagtem̄a ciuqliit atanruut!

⁹Cirlakellruanka nunarpakek Calno-nkuk, Carchemish-aaq-llu, Hamath-aaq, Arpad-aaq-llu nunarpakek. Cirlakellruagka-llu Samaria-nkuk Damascus-aaq-llu.

¹⁰Yagtellruunga anucimirqecetaarnaluki tamakut angayuqauviit agayutulit agayutnguanun, agayutnguanun amllenrulrianun Jerusalem-aami, Samaria-mi-llu.

¹¹Piunrillruaqa Samaria agayutnguartuumaan, tuaten-llu piarkaugaqa Jerusalem-aaq, agayutnguat-llu agayuvikelallrit tuani.”

¹²Tau͡gaam ATANEQ qanertuq, “Qaqiuskuma caliamnek Ingrimi Zion-aami Jerusalem-aami-llu, anucimirqecetaarciqaqa angayuqra Assyria-m ucuryagcan pivakluni-llu.”

¹³Angayuqra Assyria-m ucuryagtuq qanerluni, “Wiinga tamalkuan kiirrarma pillruaqa. Wiinga pinirtua umyuartulua-llu. Wiinga perrillruanka atanruviit nunautaita engelait teguluki-llu aklut qemagtaallrit. Angucalutun ungungssitun tutmautellruanka yuut tuani uitalriit.

¹⁴Atanruvii ellarpiim ayuqellruut yaqulgem ungluitun, wiinga-llu avullruanka tukuutait qacignarqetaluni avulriatun kayangunek. Yaquliulriartaituq qalrialriartaunani-llu alingcira'arlua.”

¹⁵Tau͡gaam ATANEQ qanertuq, “Piqertuutaq-qaa angenruniluni piciquq yugmi aturtem̄ini? Kegglaq-llu-qaa piunruuq yugmi aturtem̄ini? Kaugtuutaam naluyuita yuk; yuum kaugtuutaq nalularaa.”

¹⁶ATANREM Artuqailnguum ayagcetqataraa cangerlak anucimirqecetaarluki camirrluteng nerlalrianun. Temaitni kenertangciquq ekuaguralriamek.

¹⁷Agayun, tanqia Israel-aam, kenrurciiquq. Israel-aam tanqilria Agayutii ekualriarurciiquq, ernermi ataucimi ekuagarkauluki cat tamalkuita, cukilanaungraata caneggluungraata-llu.

¹⁸Naparugaat naucetaarviit-llu tamarmeng piunriumaciqut, ATANREM piunrirciqak tamarkenka tema yuuciq-llu, tuqunarqelriim naulluutem piunrilauciatun yuk.

¹⁹Ikgelnguaraat napat uitaqerciqut mikelnguunge'rmi naaqsugngaarkauluki.

²⁰Pillerkaq tekiciiquq Israel-aam yui uitaqallret cacetuqutek'ngairuciqaat atanruvik piunriryarpiartellerteng. Piciuluteng cacetuquteksaguciiqaat ATANEQ, Israel-aam tanqilria Agayutii.

²¹Carraat tau͡gaam Israel-aam yui uterciiqut artuqailngurmun Agayutmeggnun.

²²Israel-aam-llu yui watua amllertang'e'rmeng qau͡gyatun imarpiim canianelngurtun, carraat tau͡gaam uterciiqut. Piunrillerkarteng yuut ciunerkaqaat, pinarqut-llu tua-i tuaten.

²³Aa-ang, tua-i nunamun tamiinun Artuqailnguum ATANREM piunrillerkaq tuc'eciiqaa, qanellni aturluku.

²⁴Artuqailnguq ATANEQ qanertuq yum'inun uitalrianun Zion-aami. “Alikenriciki Assyria-rmiut, nangtengraiceci Egypt-aarmiut pillruciicetun.

²⁵Ak'anun pivkenii anucimirqecetaanrirciqamci, nutaan-llu ellait piunrirciqanka.

²⁶Wiinga Artuqailnguq ATANEQ kaugtuarciqanka qenutamkun Midian-aam yui Oreb-aam Teggalqurtaani pillrucimtun. Anucimirqecetaarciqaqa Assyria anucimirqecetaallrucimtun Egypt-aaq.

²⁷Pillerkaq tauna tekiskan, angiciiqamci pinianek Assyria-m, uskuraatnek uqamalkutangqerrngairuciiquci tusevcen̄i.”

²⁸Inglukestaita teguaqsagutaat Ai-aq![8] Kitullruut Migron-aakun! Akluteng-llu unitait Michmash-amun!

²⁹Qerallruat ingrik akuliik qavartarluteng-llu Geba-mi! Yuut nunarrarni Ramah-mi alingut cakneq, yuut-llu Angayuqam Saul-aam nuniini Gibeah-mi qimagluteng.

³⁰Qayagpagaci, Gallim-aarmiuni! Niicugnici, Laish-aarmiuni! Kiuluci, Anathoth-aarmiuni!

³¹Madmenah-rmiut Gebim-aarmiut-llu qimagtut.

³²Unuamek-llu inglukestait uitaut nunarrarmi Nob-ami, tengluteng-llu angalatait tungiinun Ingrim Zion-aam, nunarpagmun Jerusalem-aamun.

³³Artuqailnguum ATANREM igceciiqai imlluki avayatun kepumalriatun napamek. Ucuryagtenrit quyinrulriit-llu iqucimaciqut caunriumaluteng.

³⁴ATANREM kepurciqai napatun kepumalriatun piqertuutarkun napalilriim akuliini, tuaten-llu assinkacagait napat Lebanon-aami iqulauciicetun!