Read Yupik Isaiah 11 Bible Online

Isaiah 11 - Yupik bible

Isaiah 11

¹David-aam nauvii ayuqut napatun kepumalriatun; tau͡gaam napayagaat naulauciicetun acilqumek, tuaten-llu nutaraq angayuqaq nangerciiquq David-aam kinguvrinek.

²Anerneran ATANREM cikirciqaa umyuartunermek elisngamek-llu elluarrluni-llu atanirturillerkaanek yum'inek. Nallunriciiqa ATANREM pisqutii qigcikluku-llu,

³niisngallra-llu nunanikluku. Cuqcilarngaituq yuum tangellrakun wall'u niitellmikun;

⁴cuqtelarciqai arrsaulriit ellualriakun anagyaaqulluki-llu piunarquciit casciigalnguut. Qanellra aturluku yuut anucimirqecetaarumaciqut, assiitellriit-llu yuut tuquciqut.

⁵Atanirturiciquq yum'inek ellualriakun piciunerkun-llu.

⁶Keglunret qusngiyagaat-llu ilakluteng uitaciqut, kuskarpagngalnguq qusngirngalnguum-llu piyagaa qungelrallgutkeciquk. Kuluvayagaat yugtutulit-llu piyagait nerellgutkelarciqut mikelngurnek-llu aulukestengqerrarkauluteng.

⁷Kuluviit taqukat-llu nerellgutkeciqut, piyagait-llu ilakluteng qungelraaqluteng. Yugtutulit-llu nerlarciqut canegnek kuluvagtun.

⁸Mikelnguyagaunge'rmi akngiringangaituq aquingermi caniani tuqunarqelriim ciissirpiim.

⁹Zion-aami, Agayutem kencignarqelriami ingriani, akngirkengengaitut piunriringaunateng-llu tamiini tanqilriami ingrimni, tua-i-wa nuna muirumaciqngan nallunritellranek ATANREM imarpigtun mermek imaqaaralriatun.

¹⁰Erneq tekiciiquq nutaram angayuqam David-aam kinguvrinek nallunailkutaullerkaa atanruvignun. Quyurciiqut atanirturivianun nunarpagmun, uitavia-llu ucurnarqelriaruciquq.

¹¹Erneq tauna tekiskan, ATANREM pinini ataam aturciqaa ut'rulluki-llu yun'i kingunritnun unegtaullret Assyria-mi Egypt-aami-llu, Pathros-aam-llu nunaini, Ethiopia, Elam-aami, Babylonia-mi, Hamath-aami-llu, imarpiim-llu cen̄iini uitalriit qikertani-llu.

¹²ATANEQ nalugiciquq nallunailkutamek pelagmek nallunrirtelluki atanruviit ataam quyurcillerminek cekavngalrianek Israel-aam Judah-m-llu yuinek ut'rulluki-llu cetamanek nunam kangirainek.

¹³Angayuqauvian Israel-aam ciknakenqiggngaitaa Judah, Judah-m-llu inglukenqiggngaunaku Israel-aaq.

¹⁴Pillguteklutek anguyagciqakek Philistine-at kanaknelirnermi cali-llu uayarluki yuut uitalriit calaralirnermi. Cirlakciqagkek Edom-aarmiut Moab-armiut-llu, Ammon-aarmiut-llu niisngaarkaugakek.

¹⁵ATANREM-llu kinerceciiqaa Suez-aam imarpigmun anellra, puqlanilriamek-llu anuqlirtelluku kinerceciiqaa Kuik Euphrates-aaq, kuiggaacuaraat malrunlegen uitaqertelluki, kina imna piyualuku qerararkaurtelluku.

¹⁶Assyria-mek tumyarartangqerciquq atu'urkaatnek Israel-aam yuin, tuani tuqullrunrilngurnun, ciuliameng tumyararkangqellruciicetun ayallermeggni Egypt-aamek.