Read Yupik Isaiah 14 Bible Online

Isaiah 14 - Yupik bible

Isaiah 14

¹ATANREM ataam takumcukciqai yun'i Israel-aat cucukluki-llu nakmiillaqnaluki. Uitavkarciqai-llu ataam nakmiin nuniitni, allanret-llu ullagluki uitallgucirciqait.

²Amlleret atanruviit ikayurciqait Israel-aam yui utertellratni nunamun ATANREM cikiutekellranun ellaitnun, tuani-llu atanruviit kevgiurciqaat Israel-aaq piska'rtun. Israel-aat teguaqestelteng teguaqsaguciiqait, atanirturluki-llu nangtestek'lalteng.

³ATANREM mernuirceciiqai Israel-aam yui engellugtullratnek nangteqellratnek-llu cakviurluteng calivkaumalallratnek.

⁴Waten pikan, ciritekciqaat atanra Babylon-aam qanerluteng: “Takumcuyuyuilnguq angayuqaq piunrirtuq! Yugnek nangcinqiggngairutuq!

⁵ATANREM iquklicetaa piningqellrat assiitellriit atanirturtet

⁶qenrulluki nangtestait yuut taqsuunateng nanglluki atanruviit cirlakelteng.

⁷Watua nutaan ellarpiim yui tamarmeng mernuinercirtut uitanqegciluteng, tamarmeng yuut aturluteng nunaniryugluteng.

⁸Napat cypress-aat Lebanon-aam-llu cedar-aat napai nunaniryugtut angayuqaq piunrian, kitumek kepurtekairucameng catairuqaanranek.

⁹“Tuqumalriit nuniit uptuq ciuniurnaluku Babylon-aam atanra. Alangruit piningqellret nunami uitallermeggni pek'ngut. Angayuqat-llu alangruit nangerrluteng atanruvignek aqumllemeggnek.

¹⁰Tamarmeng waten qanruciiqaat, ‘Piniarututen wangkucicetun! Wangkuta ilaksagutamteggen!

¹¹Takarnarqucin nasvalallruyaaqaat aturcetaarluteng qelutelegteggun, tau͡gaam watua tuqumalriit nuniitni uitauten. Taklauten inglerluten paralunek patumaluten ciissinek.’”

¹²Atanrani Babylon-aam, tanqigcetellria unuakum agyaa, igtellruuten qilagmek! Cirlakillruyaaquten atanruvignek, tau͡gken watua nunamun egcimaluten.

¹³Umyuarteqellruyaaquten mayurnaluten qilagmun atanruviin-llu aqumlleren elliluku quliitnun quyinkacagaat agyat. Umyuarteqellruyaaquten aqumnaluten angayuqatun ingrim taum qainganun neglirnermi agayutet quyurrviatnun.

¹⁴Qanellruuten mayurciqniluten kangritnun amirlut ayuqliriluten-llu Artuqailngurtun.

¹⁵Tau͡gaam, ayaucimauten aciqsinratnun tuqumalriit uitaviata.

¹⁶Tuqumalriit irr'ikciqaatgen. Apciiqut, “Una-qaa wani-wa angun nunamek arulacilleq angayuqauviit-llu uulegcetaqluki?

¹⁷Una-qaa wani-wa angun piunririlleq nunarpagnek ellarpak-llu kinernerurrluku? Una-qaa wani-wa angun itertaminek anevkayuilnguq wall'u utercecuunaki kingunritnun?”

¹⁸Tamarmeng nunam angayuqai taklalartut assiqapigtellriani qunguni,

¹⁹tau͡gaam elpet qunguituten, temen-llu egcimauq arusqelluku. Patumaluni temaitnek anguyagtet tuqucimallret anguyagkun, egcimaluten ilakluki petmigmun teggalqumi, tutmaucimaluten-llu.

²⁰Nunan piunrillruavgu tuquqluki-llu nakmiin yut'en, tungmagcimangaituten allatun angayuqatun. Iliit-llu assiitellriit ilavet uitaqerngaituq.

²¹Tuqurqilriit ayagnirlit! Uum angayuqam qetunrai tuquciqut ciuliameng assiilnguit pitekluki. Iliit-llu atanirturingaunani nunamek wall'u nunarpagnek taqusngaunani tamaani.

²²Artuqailnguq ATANEQ qanertuq, “Anguyagciqaqa Babylon-aaq imerqelluku-llu. Camek uitaciingaitua— mikelngurnek, watqapiar-llu anagluteng unguvalrianek pitangqerrngaituq, Wiinga, ATANEQ, qanertua.

²³Babylon-aaq mecaurceciiqaqa, anipat-llu uitaviksaguciiqaat. Kagiciqaqa-llu Babylon-aaq kagitnek kagiarkauluku ca tamalkuan. Wiinga Artuqailnguq ATANEQ, qanertua.”

²⁴ATANEQ Artuqailnguq ukvernarcarillruuq waten: “Picirkiuralqa piciurciiquq. Ca piarkaurtelqa piciurciiquq.

²⁵Wiinga piunrirciqanka Assyrian-aat nunami Israel-aami, ingrimni-llu tutmauceciiqanka. Angiciiqanka yuunka Assyrian-aanek teguarullratnek uqamailngurnek-llu atmiumalallritnek.

²⁶Wani-wa una picirkiuraqa nunamun, tallika-llu yagingauq anucimirqecetaararkauluki atanruviit.”

²⁷ATANEQ Artuqailnguq waten picirkiurtuq; tallini yagtaa anucimirqecetaarinaluni, kia-llu imum arulaircessngaunaku.

²⁸Una qaneryaraq qanrutkumallruuq allrakumi angayuqaq Ahaz-aq tuqullrani.

²⁹Philistia-m yuini, kaugtuutaq kaugtuartek'lallerci ayemcimauq, tau͡gaam camek cali angniutekaituci. Ciissirpak tuquaqan, arcaqanrulriim enailaraa. Ciissirpiim-llu kayangua tuk'rilartuq ciissirpagmek yaqulegmek.

³⁰ATANEQ qusngiliurten͞guciquq arrsaulrianun yum'inun aarnailngurmi uitavkarciqai. Tau͡gaam piitnaq anagutellria tuc'eciiqaa elpecen̄un Philistine-anun, atauciunge'rmi ilasi unguvangaituq.

³¹Neplirluci kaigaci ikayuusqelluci, tamarpeci nunarpaini Philistine-am! Alingici, tamarpeci! Puyurtanguq urr'amek neglirnermek—anguyagten͞guut alingtalriamek ilaunateng.

³²Qaillun kiuciqseta qaneryaramek taitellriit Philistia-mek? Qanruciiqaput ATANREM piurtellrua Zion-aaq tuani nangteqellriit yui elluiluteng uitaciqut.