Read Yupik Isaiah 16 Bible Online

Isaiah 16 - Yupik bible

Isaiah 16

¹Nunarpagmek Sela-mek kinertellriami nunami Moab-am yuin tuyularaat cikirluku qusngiyagarmek atanirturilria Jerusalem-aami.

²Utaqalgilartut cen̄agkeni Kuigem Arnon-aam angitaarluteng, yaqulegtun ayagcecimalriatun unglumeggnek.

³Ellait qanertut Judah-m yuinun, “Qanruskut qaillun picirkamten̄ek. Camun pivkaryaqunata napatun nengllanarqelriamek talinilalriatun kiirillrani erenrem qukaani, mernuinercirtelluta-llu talinerpeni. Wangkuta qimagaugukut; iirkut kia nalaqngailkiinun.

⁴Uitavkarkut nunautevni. Pivkaryaqunakut piunriryugtemten̄un.” (Nangciyaraq piunririyaraq-llu iqukliciiquk, nunam-llu navgurtai catairuciiqut.

⁵Nutaan-llu David-aam kinguvrin iliit atanrurciiquq, atanirturciqai-llu yuut piciulriakun kenkekun-llu. Piciulria egmian atularciqaa, elluaq-llu aturtelluku.)

⁶Yui-llu Judah-m qanertut, “Niitukut Moab-armiut-gguq qutegngaut, ucuryaggluteng. Nallunritarput ellmeggnek pivakuciat caunrilketarluteng-llu, tau͡gaam ucuryagutait cauvkenateng.”

⁷Moab-am yui aluviliurciqut nangtequallerteng pitekluku. Tamarmeng aluviliularciqut umyuaqaqamegteki neqkaqegtaaraat nerlalteng nunarpagmi Kir Heres-aami. Taukut camek neryuniurutairuciiqut.

⁸Naucetaarviit canimelkiini Heshbon-aam wine-arkanek-llu naucetaarvii Sibmah-m piunriumaut—tamakut wine-arkanek naucetaarviit wine-aita atanruviit atanirturtait taangiqevkalallruit. Napayagait naumallruyaaqut nunarpak Jazer-aaq tekilluku, calaratmun-llu nuna kinerneq tekilluku, kanaknatmun-llu akilirneranun Dead Sea-m.

⁹Watua aluviliurutkanka Sibmah-m Jazer-aam-llu napayagai wine-arkanek naugitulit. Aluviliurutkagka Heshbon-aankuk Elealeh-llu, tua-i-wa naunrarnek quyurtarkartailan yuut angniutekaitnek.

¹⁰Watua angnilriartaituq naungignarqelriani naucetaarvigni. Qayagpagalriartaituq atulriartaunani-llu wine-arkanek naucetaarvigni. Tutmarluki atsanek mecuirilriartaituq wine-aurtarkanek; qayagpagalriartairutuq nunaniryulrianek.

¹¹Yuuniaraunga angniilutekluku Moab-aq, ilutequtekluku-llu Kir Heres-aaq.

¹²Moab-armiut taqsuqcirtut ellmeggnek ingrinun ayagaluteng agayuyarameggnun agayuvigpameggnun-llu piicagyarturluteng, tamana tau͡gaam ellaitnun catngungaituq.

¹³Tamana tamaa-i ATANREM qanrutkellra ciunguluki Moab-aq piluku.

¹⁴Nutaan-llu ATANEQ qanertuq, “Allrakut pingayun ciptevkenaki Moab-am tukuuterugai catairuciiqut. Yugyallrung'e'rmi, carraat tau͡gaam uitaqerciqut, cirlaulriaruciqut-llu.”