Read Yupik Isaiah 19 Bible Online

Isaiah 19 - Yupik bible

Isaiah 19

¹Una qaneryarauguq Egypt-aamek. ATANEQ taiqatartuq Egypt-aamun, amirlum qaingakun egilertellra cukaluni. Agayutnguarit Egypt-aarmiut uulegciiqut ciuqerrani, Egypt-aam-llu yui alingem tull'uki.

²ATANEQ qanertuq, “Ingluksaguceciiqanka Egypt-aarmiut atunem calluangevkarluki anelgutkellriit nunalgutkelriit-llu. Nunarpiit-llu nunarpaullgutaitnun, angayuqauviit-llu angayuqauviullgutaitnun.

³Picirkiurait Egypt-aarmiut piciurcesciigatevkarciqanka caceskellivkarluki-llu. Agayutnguameggnun ikayuusqeciqut, ciunerkarcurvikluki-llu angalkut, tuqumalrianek-llu qanellgutkitulit.

⁴Wiinga tunciqanka Egypt-aarmiut atanirturilriamun takumcutaunani, nangcitulimun-llu atanermun ataniungevkarluki. Wiinga Artuqailnguq ATANEQ qanertua.”

⁵Meq Nile-ami enciiquq, piinanermini-llu kuik kinerciqaa.

⁶Kuinri-llu kuigem tep'ngeciqut etgalillerteng maliggluku. Iitaruat, mermi-llu naumalriit nalaluteng,

⁷naucetaat-llu nauciumalriit Nile-am cen̄agkeni kinerciqai tenglluki-llu.

⁸Tamarmeng-llu yuungnaqutengqellriit neqsurluteng Nile-ami yuuniaraciqut aluviliurluteng-llu; kuvyait manait-llu atuungaitut.

⁹'Lumarraqegtaarnek-llu pilitulit ciunerkairuciiqut;

¹⁰'lumarristet munarluteng-llu calitulit navguumaciqut umyuamegteggun-llu cakneq angniinateng.

¹¹Ciuliqagtai nunarpiim Zoan-aam usviitqapigtut! Egypt-aam yuin umyuartunqurrait alerquigut usviilngurtarnek! Ciin-llu qanrusnguartatgu Egypt-aam atanra kinguveqniluteng ciuqvallarnun umyuartulrianun, angayuqanun-llu?

¹²Angayuqrani Egypt-aam, nauwa-mi umyuartulriit yut'en? Aipaagni qanrucugngalliatgen ATANREM Artuqailnguum picirkiurainek Egypt-aamun.

¹³Ciuliqagtekek Zoan-aankuk Memphis-aaq-llu usviirutut. Ciuliqagcilriaruarkaullruyaaquk atanruviim yuinek, tau͡gaam iqlutmun ayautellruit.

¹⁴ATANREM uunguciitnarqelrianek ayuqucirtuagivkarai. Taumek, Egypt-aaq callermikun elluatuurcesciigalnguq, taangiqluni ayalualriatun ayuqliriluni qurrasqitalriatun-llu miryaminun.

¹⁵Atauciunge'rmi Egypt-aam yuini, tukuunge'rmi arrsaunge'rmi, piuranrulriarung'e'rmi cakegtaunrilngermi-llu, ikayurciigaciiqaa.

¹⁶Pillerkaq tekiciiquq Egypt-aam yui alingtarillerkaat arnatun. Uulegciiqut alingluteng tangerqunegteggu ATANREM Artuqailnguum tallia yagingaluku anucimirqecetaarnaluki.

¹⁷Egypt-aam yuin cakneq aliksaguciiqaat Judah neq'e'rqamegteggu ellmeggnun tuc'etarkaa ATANREM Artuqailnguum.

¹⁸Pillerkaq tauna tekiskan, Hebrew-tun qalartelarciqut tallimani Egypt-aarmiut nunarpaitni. Yuut tamaani ukvernarcarilarciqut atrakun ATANREM Artuqailnguum. Nunarpiit-llu iliit aterpagciiqaat waten, “Akertem Nunarpii.”

¹⁹Pillerkaq tauna tekiskan, ekuavigtangciquq ATANERMUN Egypt-aam nuniini, naparyamek-llu teggalqumek umyuaqutkaanek naparciciqut Egypt-aarmiut nunautiita engeliini.

²⁰Nallunailkutauciqut ATANREM Artuqailnguum uitacianun Egypt-aami. Tamaanelnguut yuut nangcimaluteng qayagauraqata ATANERMUN ikayuusqelluteng, ikayurtekaitnek tuavet ayagcecilarciquq.

²¹ATANEQ-llu nallunrirceciiquq Egypt-aarmiunun, ellaita-llu nallunrirciqaat agayulangluteng elliinun, payugtaqluku-llu ekuagarkanek elliitnek-llu. Ellait-llu ilungluteng akqiciqut elliinun akqutkellerteng-llu aturarkauluku.

²²ATANREM anucimirqecetaarciqai Egypt-aarmiut, tau͡gaam cali canrircetarkauluki. Ellait cauciqut elliinun, niiciiqai-llu piicautait canrirtelluki-llu.

²³Pillerkaq tauna tekiskan, tumyarartangciquq Egypt-aamek Assyria-mun. Yuut taukunek nunanek ayagalarciqut ullagalluteng atunem, angayuqauviik-llu malruk quyurmek agayularciquk.

²⁴Pillerkaq tauna tekiskan, Israel-aam pitacirciqak Egypt-aaq Assyria-llu, ukut-llu pingayun atanruviit atawaqautnguciqut ellamun tamalkuan.

²⁵ATANREM Artuqailnguum atawaqerceciiqai qanerluni, “Atawaqerceciiqamken, Egypt-aaq, wiinga yumni; elpet, Assyria-mi, wiinga piliaqellemni; elpet cali, Israel-aaq, cucukluci yumni.”