Read Yupik Isaiah 2 Bible Online

Isaiah 2 - Yupik bible

Isaiah 2

¹Wani-wa qaneryaraq Agayutem cikiutekellra Isaiah-mun Amoz-aam qetunraanun Judah-nkuk Jerusalem-aaq-llu pilukek.

²Ernerni tekitarkani ingriq Agayuvigpiim naumavia tamalkuitni qertunrurciiquq, qertunruluni tamalkuitni qemini. Amlleret atanruviit arulaiyuunateng ullagciqaat,

³yuit-llu qanerciqut, “Mayurnaurtukut ingrianun ATANREM,[2] Agayuvigpiinun Israel-aat Agayutiita. Elliin-llu elitnaurciqaakut canek pisqumakminek; piyuaciqukut tumyarani cucukellrini. Tua-i ATANREM elitnaurutii tailartuq Jerusalem-aamek; Zion-aamek qanlartuq yum'inun.”

⁴Arenqiallugutait atanruviit kitugtelarciqai. Nuussirpateng nunamun itumcissuutngurciiqait panateng-llu naunrarnun kepurissuutngurrluki. Atanruviit anguyautenqiggngaitut, uptenqiggngaunateng-llu anguyagnaluteng.

⁵Kitaki watua, kinguvrini Jacob-aam, piyuanaurtukut tanqigmi ATANREM cikiutekellrani wangkutnun!

⁶Agayun, cakaallruaten yut'en, Jacob-aam kinguvri! Angalkuliulriit-llu nunami amlleriluteng Calaramek Philistia-mek-llu yuut maligtait allanret piciryarait.

⁷Nuniit qerrirliucirtuq suulutaarucirluni-llu, tukuutait-llu cuqaunateng. Horse-aat-llu amlleqapigtut nuniitni, akalrialget-llu ayagassuutait cuqaitut.

⁸Nuniitni agayutnguat amlleqapigtut, agayuaqluteng unatmeng piliallritnun.

⁹Tamarmeng caunrilkumaarkaugut kasnguyugcecimaluteng. Au͡g'aricaqunaki, ATANEQ!

¹⁰Iirciqut teggalqut qerranqurritni, wall'u elagciqut nunami qimangnaqluteng ATANREM eq'uqertiinek, iingnaqluteng-llu pinianek ucurnarqucianek-llu.

¹¹Erneq tekiciiquq yuum ucuryagtellran iquklitlerkaa, ucuryaggluni yuusciigalillerkaa. Tuani ATANEQ kiimi nanraumaarkauguq.

¹²Ernermi tuani Artuqailnguum ATANREM pivakenrirceciiqai pinilriit caunrirluki tamalkuita-llu ucuryagtellriit angkellriit-llu ellmeggnek.

¹³Elliin piunrirciqai sugtulriit Lebanon-aam napai tamalkuita napat teggellriit, oak-at, Bashan-aam nuniini.

¹⁴Manigciiqai qertulriit ingrit qemit-llu,

¹⁵tamalkuita qertulriit nayurviit, casgui-llu asvairqumalriim enem.

¹⁶Kic'eciiqai angenkacagaat tangssunarqelriit sun'at.

¹⁷Yuum ucuryagutekellra ellminek iqukliciiquq, umyuamikun-llu ellminek angkellria piunrirluni. Agayutnguat tamaq'apiarmeng catairuciiqut, tuani ATANEQ kiimi nanraumaarkaungami.

¹⁹Yuut iirciqut teggalqut qerranqurritnun wall'u elagciqut nunami qimangnaqluteng ATANREM eq'uqertiinek, iingnaqluteng-llu pinianek ucurnarqucianek-llu, taikan arulacarturluku nuna.

²⁰Tauna erneq tekiskan, egqaqciqait suulutaat qerrirlit-llu agayutnguat pilialteng, unilluki avelngarnun unuirnun-llu.

²¹ATANEQ taikan arulacarturluku nuna, yuut iiraciqut elanernun, qerranernun-llu teggalquni qimangnaqluteng eq'uqertiinek, iingnaqluteng-llu pinianek ucurnarqucianek-llu.

²²Cacetuqutekinrirci yugmek tuquarkaulriamek. Caunrilan.