Read Yupik Isaiah 20 Bible Online

Isaiah 20 - Yupik bible

Isaiah 20

¹Alerquutii aturluku Angayuqam Sargon-aam Assyria-rmium, ciuqlikacagiita anguyagtain Assyria-m, anguyagaa Philistine-at nunarpiit, Ashdod-aaq, cirlakluku-llu.

²Tuani pingayun allrakut ciungatni ATANREM qanrutellrukii Isaiah Amoz-aam qetunraa aluilitak yuusqellukek missuulleq-llu aturaa. Tuaten-llu pillruuq tarralluni-llu matarmi kamilarmi-llu.

³Ashdod-aam tegumallran nalliini, ATANEQ qanertuq, “Wiinga pisteka Isaiah tarratellrurtuq matarmi kamilarmi-llu pingayuni allrakuni. Una nallunailkutauguq tekitarkaagnun Egypt-aam, Ethiopia-m-llu.

⁴Angayuqran Assyria-m ayauciiqai matangqaluki itertat teguaqellni ukugnek nunagnek. Ayagyuat ak'allaat-llu, piyuaciqut kamilarmeng matarmeng-llu, nulluit capaunateng, kiaresngiatelluki Egypt-aarmiut.

⁵Cacetuqutekestellri Ethiopia-m ucuryagutekluku-llu Egypt-aaq umyuassuugarciqut, ciunerkairulluteng.

⁶Tauna pillerkaq tekiskan, yuut uitalriit Philistia-m cen̄iini qanerciqut, ‘Tangerciu qaillun pimaciat yuut cacetuquteklemta Assyria-m angayuqranun pivkaasqevkenata! Qaillun-kiq tua-i wangkuta anagniarceta?’”