Read Yupik Isaiah 21 Bible Online

Isaiah 21 - Yupik bible

Isaiah 21

¹Una qaneryaraq Babylon-aamek qanelriaruuq. Ull'uyaatun qeralriatun kinernerkun, pillugnarqelriit tekiciiqut uluryanarqelriamek nunamek kingunirluteng.

²Tangrruallruunga nangteqnarqelrianek tekitarkanek, yuut ilameggnek tun'ilallerkaatnek, piunririlriamek-llu. Anguyagtaini Elam-aam, curugci! Anguyagtaini Media-m, avatairciki nunarpiit! Agayutem iqukliceciiqaa nangcivakallra Babylon-aam.

³Tangellma niitellma-llu tangrruamni alingevkaraanga, engellugturtellua-llu arnatun teggiurcilriatun.

⁴Umyuaqa uivuq, uulegglua alingem ugaani. Nerinitellruunga-llu atakullerkaanek, tau͡gken atakum camek taitenritaanga alingmek tau͡gaam.

⁵Tangrruamni tangertua nerevkaritekamek upingalriamek; natrem qallii sagingaluteng neryartulriit aqumvigkait. Tua-i ner'ut merluteng-llu. Nernginanratni alqunaq qayagpagait: “Anguyagtet atanritni! Capkutaci upciki!”

⁶Tua-llu ATANREM qanrutaanga, “Ayagluten nayurtem̄ek elliigi, alerqurluku-llu qanrutkuraasqelluki tangellri.

⁷Tangerqan angutnek horse-aatgun tailrianek, malruuqaqluteng, angutnek-llu ekumalrianek ciulvagni qulugnelegni-llu, tamakut murilkenqegcaarararkaugai.”

⁸Nayurta qayagaurtuq, “Nayurvimni nayuumallruunga ernerpak unugpak-llu.”

⁹Alqunaq-llu tangertua agiirtellrianek horse-aatgun, malruuqaqluteng. Nayurta-llu qanerluni, “Babylon-aaq cirlakumauq! Agayutnguarit-llu agayuvikelallrit ciqumumaluteng saggluteng cailkami.”

¹⁰Yumni Israel-aaq, caarrluirumalriani mukaarkatun, watua qanerkaqa assilria qanrutkellruaqa elpecen̄un niitelqa ATANERMEK Artuqailngurmek, Agayutiitnek Israel-aat.

¹¹Uum qanrutkarkam Edom-aaq piluku piuq. Iliita qayagauraanga Edom-aamek, “Nayurtaa, qaillun pitaria unuum pellullerkaa? Qanrusnga qaku iquklitlerkaanek?”

¹²Wiinga-llu kiugaqa, “Unuakuq agiirtuq, tau͡gaam cali ununqigciiquq. Cali aptenqigcukuvet, tailuten cali apeskina.”

¹³Una qanrutkarkaq Arabia piluku piuq. Dedan-aam yuini, elpeci ayagallerpecen̄ek arulailalriani camek naumastailngurmi nuniini Arabia-m,

¹⁴mermek cikirciki meqsugluteng elpecen̄un ullautellriit. Elpeci-llu Tema-m yuini, qimagaulriit yuut neqkaitnek cikirciki.

¹⁵Yuut qimagaut nuussirpagnek tuqungnaqestemeggnek, urluvernek-llu urniumalrianek, qimagluteng anguyagmi alingnarqelrianek.

¹⁶Tua-llu ATANEQ qanertuq wangnun, “Allrakuq atauciq ciptevkenaku ucurnarqellra yuullgutkelriarin Keder-aam iqukliciiquq.

¹⁷Pitgaqustait alingilkacagaqait anguyagtain Kedar-aam, tau͡gaam carraat uitaqerciqut. Wiinga, ATANEQ, Israel-aat Agayutiit, qanertua.”